Անցած հանգստյան օրերին ձնաբուքերի պատճառով Միացյալ Նահանգներում մոտ 3 հազար ավիաչվերթ է չեղարկվել։ Այս մասին են վկայում FlightAware մասնագիտացված պորտալի տվյալները։

Միևնույն ժամանակ, ավելի քան 21,000 չվերթ է հետաձգվել։ Ամենաշատ չվերթերի ուշացումներ և չեղարկումներ գրանցվել են Բոստոնի (Մասաչուսեթս), Դետրոյթի (Միչիգան), Մինեապոլիսի (Մինեսոտա), Նյու Յորքի (Նյու Յորք) և Չիկագոյի (Իլինոյս) օդանավակայաններում։

Ազգային օդերևութաբանական ծառայության տվյալներով՝ ուժեղ ձնաբուքերը հիմնականում տեղացել են Միջին Արևմուտքի նահանգներում։ Որոշ վայրերում դիտվել է ռեկորդային քանակությամբ տեղումներ։ Մասնավորապես, նոյեմբերի 29-ից 30-ն ընկած ժամանակահատվածում Չիկագոյի օդանավակայանի շրջակայքում տեղացել է 21 սմ ձյուն, ինչով գերազանցվել է 1951 թվականի ռեկորդը (20 սմ)։ Երկուշաբթի-երեքշաբթի օրերին ուժեղ ձնաբուքեր են սպասվում ԱՄՆ-ի Ատլանտյան ափի նահանգներում։

ԱՄՆ-ում առաջին ուժեղ ձնաբուքերը հանգեցրել են զանգվածային ճանապարհատրանսպորտային պատահարների։ Մասնավորապես, Ինդիանա նահանգում վատ եղանակային պայմանների պատճառով բախվել է մոտ 45 ավտոմեքենա։ Զանգվածային ՃՏՊ-ներ են գրանցվել նաև այլ նահանգներում։

Այովա նահանգի Դե-Մոյնի օդանավակայանում՝ ուժեղ տեղումների պատճառով, ուղևորատար ինքնաթիռը դուրս է եկել թռիչքուղու սահմաններից։ 54 մարդ տարհանվել է և ավտոբուսներով տեղափոխվել օդանավակայանի շենք։ Տուժածներ չկան։