նախընտրելի դարձնել
Բելառուսի առաջնորդ Ալեքսանդր Լուկաշենկոն իրեն անվանել է «հեռացող» նախագահ, որը չի ցանկանում իր խնդիրները գցել ապագա սերունդների վրա։ Նա այս հայտարարությունն արել է Newsmax TV-ին տված հարցազրույցում։
«Ես հեռացող նախագահ եմ, ես հաճախ եմ այդ մասին ասում և չեմ ցանկանում, որ այն խնդիրները, որոնք առաջացել են իմ կողմից երկրի ղեկավարման ժամանակաշրջանում, փոխանցվեն նոր սերունդներին», - ասել է Լուկաշենկոն։ Նա ընդգծել է, որ ցանկանում է լավ հարաբերություններ հաստատել Մինսկի և Վաշինգտոնի միջև և կոչ է արել ԱՄՆ նախագահ Դոնալդ Թրամփին հաղթահարել 2020 թվականին առաջացած տարաձայնությունները, երբ ԱՄՆ-ն և Արևմուտքի այլ երկրներ աջակցել են Բելառուսում տեղի ունեցող հակակառավարական բողոքի ցույցերին։
«Յուրաքանչյուր սերունդ իր խնդիրները պետք է ինքնուրույն լուծի։ Մեր սերունդը՝ Թրամփը, Լուկաշենկոն, ունենք խնդիրներ և մենք պետք է դրանք լուծենք»,- հավելել է Բելառուսի նախագահը։
Լուկաշենկոն նաև կարծիք է հայտնել, որ Վաշինգտոնը, լինելով 2020 թվականին Բելառուսում տեղի ունեցած հանրահավաքների կողմնակիցը, պարտվել է և պետք է ընդունի իր պարտությունը։
Մայիսին Լուկաշենկոն հայտարարել է, որ «մի փոքր ավելի երկար է մնում» իշխանության գլուխ՝ առաջնորդների երիտասարդ սերունդ պատրաստելու համար: Օգոստոսին Լուկաշենկոն հայտարարել է, որ չի պլանավորում առաջադրվել ևս մեկ նախագահական ժամկետով: Ալեքսանդր Լուկաշենկոն Բելառուսի նախագահն է 1994 թվականից: Նա ԱՊՀ առաջնորդների շարքում ամենաերկար ծառայած առաջնորդն է՝ Տաջիկստանի Էմոմալի Ռահմոնի հետ միասին:
