ԱՄՆ Հարավային հրամանատարությունը հայտարարել է, որ ուրբաթ օրը Կարիբյան ավազանում հարված է հասցրել մի նավի, որը, ըստ ենթադրության, թմրանյութեր էր տեղափոխում, ինչի հետևանքով զոհվել է երեք մարդ։ Հարավային հրամանատարությունը X սոցիալական ցանցում հայտնել է, որ «Հարավային նիզակ» միացյալ օպերատիվ խումբը «մահաբեր կինետիկ հարված է հասցրել մի նավի, որը ղեկավարվում էր որոշակի ահաբեկչական կազմակերպությունների կողմից»։

Հրամանատարության հաղորդագրության համաձայն՝ «հետախուզական տվյալները հաստատել են, որ նավն անցնում էր Կարիբյան ավազանում թմրամիջոցների շրջանառության հայտնի երթուղիներով և ներգրավված էր թմրանյութերի անօրինական շրջանառության գործողություններում»։

«Այս գործողության ընթացքում սպանվել է երեք թմրաահաբեկիչ։ ԱՄՆ զինվորականների շրջանում տուժածներ չկան»,- ասվում է հաղորդագրության մեջ։ Միևնույն ժամանակ, ԱՄՆ-ն ապացույցներ չի ներկայացրել, որոնք կհաստատեին նավի, ուղևորների, բեռի կամ զոհերի թվի վերաբերյալ իրենց պնդումները։

Այս վերջին հարձակումն իրականացվել է այն բանից հետո, երբ երկուշաբթի օրը ԱՄՆ-ն Խաղաղ օվկիանոսի արևելյան հատվածում հարված է հասցրել մեկ այլ նավի (դարձյալ թմրանյութերի ենթադրյալ տեղափոխման կասկածանքով), ինչի հետևանքով երկու մարդ զոհվել է, իսկ մեկը՝ ողջ մնացել։

ԱՄՆ-ը վերսկսել է նավերի վրա հարձակումները հունվարի վերջին՝ տարածաշրջանում նավակների վրա գրոհների դադարից հետո, որը հաջորդել էր հունվարի 3-ին Վենեսուելայի նախագահ Նիկոլաս Մադուրոյի ձերբակալությանը։

Մադուրոն պահվում է Նյու Յորքի բանտում՝ մեղադրվելով մի շարք հանցանքների մեջ, այդ թվում՝ ահաբեկչության դեմ պայքարի նպատակով դավադրության և կոկաինի ներկրման համար։ Նա իրեն մեղավոր չի ճանաչել առաջադրված բոլոր մեղադրանքներով։

Պաշտպանության նախարարության տվյալներով՝ սեպտեմբերից ի վեր իրականացվել է առնվազն 37 հարված, որոնց հետևանքով զոհվել է 120 մարդ։