նախընտրելի դարձնել
2025 թվականին էլեկտրամատակարարման և գազամատակարարման համակարգերում իրականացվել են 52 միլիարդ դրամի ներդրումներ. 31 միլիարդ դրամը՝ էլեկտրամատակարարման, իսկ 21 միլիարդ դրամը՝ գազամատակարարման համակարգում։ Այս մասին փետրվարի 16-ին լրագրողների հետ հանդիպման ժամանակ հայտարարել է Հայաստանի Հանրային ծառայությունները կարգավորող հանձնաժողովի (ՀԾԿՀ) նախագահ Մեսրոպ Մեսրոպյանը։
Նա տեղեկացրել է, որ առաջին անգամ 10,7 միլիարդ դրամ է ներդրվել ջրամատակարարման համակարգում. 5,2 միլիարդ դրամը՝ «Վեոլիա ջուր» ընկերության կողմից, ևս 5,5 միլիարդ դրամը՝ Հայաստանի Ջրային կոմիտեի կողմից։
Նրա խոսքով՝ 2025 թվականին փոքր ՀԷԿ-երի և վերականգնվող այլ աղբյուրների կողմից արտադրված էլեկտրաէներգիայի մասնաբաժինը 2024 թվականի 21,1%-ի փոխարեն հասել է 23,4%-ի։
Մեսրոպյանը նկատել է, որ եթե 2016 թվականին վերականգնվող էներգետիկայի աղբյուրները կարող էին արտադրել մինչև 200 կՎտ, ապա 2025 թվականին այդ աղբյուրների ընդհանուր տեղակայված հզորությունը կազմել է ավելի քան 640 ՄՎտ, ընդ որում՝ միայն նախորդ տարի այդ ցուցանիշն աճել է 220 ՄՎտ-ով։
Պաշտոնյան հավելել է նաև, որ «Հայաստանի էլեկտրական ցանցեր» ընկերությունը 2025 թվականի հունվարից սեպտեմբեր ընկած ժամանակահատվածում ավելի քան 145 հազար բաժանորդների վճարել է 285 մլն դրամի չափով տուգանք։
Կառույցի ղեկավարը հիշեցրել է, որ Հայաստանի Հանրային ծառայությունները կարգավորող հանձնաժողովը նոյեմբերին էլեկտրաէներգիայի բաշխման լիցենզիայից զրկել է «Հայաստանի էլեկտրական ցանցեր» ընկերությանը, որը պատկանում է «Տաշիր» ընկերությունների խմբին:
Նա պարզաբանել է, որ 2025 թվականին ՀԾԿՀ-ն 51 մլն դրամի չափով տուգանքներ է սահմանել Հանձնաժողովի կողմից կարգավորվող այլ սուբյեկտների նկատմամբ, այդ թվում՝ 10 մլն դրամ՝ «Հայաստանի էլեկտրական ցանցեր», իսկ 20 մլն դրամ՝ «Վեոլիա ջուր» ընկերության նկատմամբ: Պաշտոնյան նշել է, որ Հանձնաժողովի կողմից կարգավորվող ընկերությունները պետական բյուջե են վճարել 10,3 մլրդ դրամ՝ լիցենզիաների շրջանակում կատարված վճարումների և դրանց պահանջների խախտման համար սահմանված տուգանքների արդյունքում:
Մեսրոպ Մեսրոպյանը հավաստիացրել է, որ Հայաստանի բոլոր բնակավայրերում հասանելի են 4G տեխնոլոգիաները, իսկ բնակչության 95%-ին՝ 5G տեխնոլոգիաները:
Միաժամանակ նա նշել է, որ գազի և էլեկտրաէներգիայի սակագները 2025 թվականին չեն փոփոխվել՝ ընդգծելով, որ ջրի սակագները 2026 թվականի համար նույնպես մնացել են անփոփոխ:
