Քուվեյթի հայկական համայնքն ամեն տարի դեկտեմբերի 31-ի գիշերը պարահանդես է կազմակերպում եւ Ամանորը նշում է Միջին Արեւելքի ավանդույթներով: Այս մասին NEWS.am-ի թղթակցին ասաց համայնքի ներկայացուցիչ, հայերենի ուսուցչուհի Մարալ Համբոյանը, որն արդեն 11 տարի է՝ բնակվում է Քուվեյթում:
«Քուվեյթում ազգային վարժարան ու եկեղեցի ունենք: Դեկտեմբերի 30-ին դպրոցականները գնում են եկեղեցի, հաղորդություն ստանում, որից հետո դպրոցում արդեն մեծ խրախճանք է կազմակերպվում: Դեկտեմբերի 31-ին երեկոյան արդեն պարահանդես է կազմակերպվում, որին ամբողջ հայությունն է մասնակցում: Միջին Արեւելքի ավանդույթներով ենք նշում, արեւելյան ճաշատեսակներ ենք պատրաստում: Կարեւորն այն է, որ հավաքվում եւ միասնաբան նշում ենք Ամանորը, մնացածը կարեւոր չէ»,- ասաց Մարալ Համբոյանը:
Նրա խոսքով՝ կան հայեր, որոնք գերադասում են Ամանորը դիմավորել տանը իրենց հարազատների հետ, սակայն մեծ մասամբ միանում են պարահանդեսին:
«Վերջին տարիներին Հայաստանից մեծ արտահոսք կա դեպի Քուվեյթ, այս հայերն էլ հայաստանյան ավանդույթներն են բերում իրենց հետ: Մեր համայնքը շատ միասնական է, բոլոր ազգային եւ կրոնական տոները միասին ենք նշում, ամեն ուրբաթ հայկական եկեղեցի ենք հաճախում՝ պատարագի»,- ասաց Մարալ Համբոյանը:
Նշենք, որ Քուվեյթում բնակվում է մոտ 4 հազար հայ: Նրանք մեծ մասամբ արհեստավորներ են, հատկապես հայտնի հայ ոսկերիչներ կան Քուվեյթում:
«Կան նաեւ հայեր, որոնք բարձր պաշտոններ են զբաղեցնում այստեղ»,- հավելեց Մարալ Համբոյանը:
