ԱՄՆ նախագահ Դոնալդ Թրամփը եւ Սաուդյան Արաբիայի թագավոր Սալման իբն Աբդուլ Ազիզ Ալ Սաուդը Էր Ռիյադ Թրամփի այցին նվիրված պաշտոնական արարողության ժամանակ պարել են ավանդական սրերով արդա պարը, փոխանցում է Lenta-ն:
Արդան սկսվում է թմբուկների զարկերի ներքո կրկնվող բանաստեղծական տողով: Այնուհետեւ պարողները օդ են պարզում սրերը՝ արտահայտելով իրենց ուրախությունն ու հպարտությունը: Պարը հաճախ զուգորդվում է ռազմական ձեռքբերումներին, սակայն մեր օրերում հաճախ կատարվում է տարբեր պաշտոնական միջոցառումների ժամանակ:
ԱՄՆ նախագահը Սաուդյան Արաբիա է ժամանել մայիսի 20-ին. սա նրա առաջին արտասահմանյան այցն է: Սաուդյան թագավորը Սպիտակ տան տիրոջն ընդունել է Ritz-Carlton հյուրանոցում: Թրամփի հետ Սաուդյան Արաբիա են մեկնել նաեւ կինը՝ Մելանյան, դուստրը՝ Իվանկան, եւ նրա ամուսինը՝ Ջարեդ Քուշները: Նշվում է, որ պաշտոնական անձանց հետ հանդիպմանը Մելանյան առանց հիջաբի է ներկայացել, որը մուսուլմանական երկրներում պարտադիր է համարվում: Իվանկա Թրամփը եւս քաղաքական գործիչների հետ հանդիպմանն առանց գլխաշորի է եղել:
