Հուլիսին FAO-ի պարենամթերային գների գործակիցը շարունակել է աճել ու հասել է ամենաբարձր նիշին՝ 2015-ի հունվարից հետո։ Աճի գլխավոր «խթաններն» են դարձել թանկացող շաքարը, կաթնամթերքն ու հատիկավորները, հայտնում է ՄԱԿ-ի ռադիոն։
Շաքարի գները, օրինակ, անցած ամիս կտրուկ բարձրացել են, 5․2 տոկոսով, ի դեպ այս տարվա մեջ առաջին անգամ։ Գների վերականգնման գլխավոր գործոնն է դարձել ռեալի ՝ աշխարհի խոշորագույն շաքար արտադրող ու արտահանող Բրազիլիայի դրամական միավորի ամրապնդումը։
Հատիկավորների գները հուլիսին աճել են 5․1 տոկոսով՝ հիմնականում բրնձի ու հացահատիկի հաշվին։ Շոգ ու չոր եղանակային պայմանները դժվարացնում են հացահատիկ աճեցնելը Հյուսիսային Ամերիկայում։
Կաթնամթերքի գների գործակիցը աճել է ոչ այնքան զգալիորեն՝ 3․6 տոկոսով։
Բուսական յուղերը մի քիչ էժանացել են, իսկ մսի գները մնացել են գրեթե անփոփոխ։
FAO-ի պարենամթերային գների գործակիցը միջին ցուցանիշ է, որը արտահայտում է միջազգային գների դինամիկան պարենամթերային հումքային ապրանքների հինգ հիմնական խմբերի համար ՝ հատիկավորների, կաթնամթերքի, շաքարի, բուսական յուղի ու մսի։