Արցախի փողոցում մայիսի 17-ին վթարի (ֆոտոռեպորտաժ) ենթարկված թիվ 76 երթուղին սպասարկող մեքենաների տեխնիկական վիճակն, ընդհանուր առմամբ, եղել է բավարար: Այս մասին NEWS.am-ի թղթակցին հայտնեց Երեւանի քաղաքապետարանի ենթակայության «Երեւանտրանս» ՓԲԸ տնօրեն Միասկ Համբարձումյանը: Նա նշեց, որ 76 երթուղին սպասարկող միկրոավտոբուսները տեխնիկական թերություններ չէին կարող ունենալ, քանի որ երթուղին սպասարկելուց առաջ համապատասխան տեխնիկական զննություն են անցնում: Դա կազմակերպվում է երթուղին սպասարկող ընկերության կողմից:
«Երեւանտրանսը» երթուղայինների տեխնիկական խնդիրներով չի զբաղվում, մենք ընդամենը զբաղվում ենք սահմանված ժամկետում մրցույթներ անցկացնելով: Մեր դիսպետչերները մրցույթում հաղթածների ուղեգրերն են նայում` ստուգելու, թե տվյալ երթուղայինի վարորդի վարորդական վկայականում կա՞ «D» կատեգորիա, այսինքն` ուղեւոր փոխադրելու իրավունք: Ստուգում ենք նաեւ մեքենայի արտաքին տեսքը, սանիտարական վիճակը: Եթե դրանք նորմալ չեն լինում, տվյալ մեքենաները հանվում են սպասարկումից»,-հայտարարեց Համբարձումյանը:
Հարկ է նշել, սակայն, որ թիվ 76 երթուղին սպասարկող ընկերությունը օրեր առաջ Երեւանի քաղաքապետարանի որոշմամբ զրկվել է երթուղին սպասարկելու իրավունքից: Քաղաքապետարանի նման որոշման հիմք են հանդիսացել քաղաքացիների կողմից ստացված բողոքները, ըստ որոնց` երթուղին սպասարկող ընկերության վարորդների կողմից որպես փոխադրավարձ ուղեւորներից գանձվել է 200 դրամ: Սա ընկերության եւ քաղաքապետարանի միջեւ կնքված պայմանագրի համապատասխան ենթակետով նախատեսված` երթուղին 100 դրամ ուղեվարձով սպասարկելու պարտավորության խախտում է:
Թիվ 76 երթուղին սպասարկող ընկերությունը պատկանում է «Լյուդվիգ եւ որդի» ՍՊԸ-ին:
Նշենք, որ ոստիկանությունն առայժմ չի պարզել, թե ինչն է եղել վթարի հետեւանքով առաջացած հրդեհի պատճառը եւ այդ ուղղությամբ համապատասխան քննություն է իրականացվում: Ըստ նախնական տեղեկությունների, հրդեհը բռնկվել է վթարի ենթարկված մեքենաներից մեկի`«Մերսեդեսի» բենզաբաքի պայթյունից:
Հիշեցնենք, որ մայիսի 17-ին, ժամը 21.10-ի սահմաններում Արցախի փողոցի թիվ 24 շենքի հարակից տարածքում իրար են բախվել «Մերսեդես» մակնիշի 23 ՍԼ 673 համարանիշի եւ «ԳԱԶԵԼ» մակնիշի 3456 Տ համարանիշի թիվ 76 երթուղին սպասարկող ավտոմեքենաները: Բախման հետեւանքով, «ԳԱԶԵԼ»-ը պայթել է եւ հրդեհ է բռնկվել: Մարդիկ կենդանի-կենդանի այրվել են: 4 մարդ զոհվել է, 9-ը` վիրավորվել եւ ստացել տարբեր աստիճանի մարմնական վնասվածքներ: Վիրավորներն այս պահին բուժում են ստանում «Էրեբունի» բժշկական կենտրոնում:
Դեպքի վայր են ուղարկվել երկու մարտական հաշվարկ, հրդեհը մեկուսացվել է ժամը 21։36-ին, մարվել՝ 22։35-ին։
Լուսանկարը` Գագիկ Շամշյանի