նախընտրելի դարձնելԻԿՕՄՕՍ-ը` Հուշարձանների եւ տեսարժան վայրերի միջազգային խորհուրդը Սիրիայում տեղի ունեցող ռազմական գործողությունների հետզհետե ուժգնացման կապակցությամբ տարածել է հաղորդագրություն` միջազգային մշակութային հանրությանը կոչ անելով միավորել ջանքերը Հալեպի մշակութային ժառանգությունը փրկելու ուղղությամբ:
«ԻԿՕՄՕՍ/Հայաստան» հասարակական կազմակերպությունից հայտնում են, որ հաղորդագրության մեջ մասնավորապես ասվում է.
«Հալեպ քաղաքը 1986 թվականից գրանցված է ՅՈՒՆԵՍԿՕ-ի Համաշխարհային ժառանգության ցուցակում` որպես հարուստ մշակութային բազմազանությունների եւ չընդմիջվող հաջորդական բնակեցումների վկայություն: Այն 12-րդ դարի բացառիկ էյուբյան քաղաքներից է` ռազմական ամրաշինություններով, որոնք կառուցվել են խաչակիրների դեմ Սալահ ադ-Դինի հաղթանակից հետո:
ԻԿՕՄՕՍ-ը չափազանց մտահոգ է այս կոնֆլիկտի հետեւանքով Համաշխարհային ժառանգության քաղաք հանդիսացող Հալեպի ժառանգությանը սպառնացող վտանգների համար:
Հիշեցնելով Զինված ընդհարման դեպքում մշակութային արժեքների պաշտպանության մասին կոնվենցիան (Հաագա, 1954թ.), ԻԿՕՄՕՍ-ը զինված ընդհարման մեջ ներգրավված բոլոր կողմերին կոչ է անում հարգանք դրսեւորել ու պաշտպանել Հալեպի մշակութային ժառանգությունը: Հալեպի մշակութային ժառանգության պաշտպանության կոչով հանդես է եկել նաեւ ՅՈՒՆԵՍԿՕ-ն:
ԻԿՕՄՕՍ-ը մտահոգված է նաեւ Սիրիայի Արաբական Հանրապետության կողմից ՅՈՒՆԵՍԿՕ-ի Համաշխարհային ժառանգության ցուցակում գրանցված, ինչպես նաեւ ազգային ու տեղական նշանակություն ունեցող մշակութային ժառանգության պահպանությամբ. հուշարձաններ, պատմական բնակավայրեր, հնագիտական վայրեր, թանգարաններ ու մշակութային այլ օջախներ:
Սիրիական ընդհարման հենց սկզբից Սիրիայի մշակութային ժառանգության միջազգային պաշտպանության դիմումներով հանդես է եկել նաեւ «Կապույտ վահան» միջազգային կոմիտեն` կոչ անելով պաշտպանել այս երկրի անգնահատելի մշակութային ժառանգությունը»:
