Առողջապահության նախարար Դերենիկ Դումանյանն ընդունել է Հայաստանում   Հնդկաստանի արտակարգ եւ լիազոր դեսպան  Սուրեշ Բաբուին եւ նրա հետ քննարկել առողջապահության բնագավառում հայ-հնդկական համագործակցության երկուստեք հետաքրքրություն ներկայացնող հարցեր:

ԱՆ մամուլի ծառայությունից հայտնում են, որ կարեւորելով հայ-հնդկական հարաբերությունների դինամիկ զարգացումը` նախարար Դումանյանն առաջնահերթ  է համարել դեղարտադրության եւ դեղագիտության ոլորտում  համագործակցության շրջանակների ընդլայնումը:

Նախարարը նշված ուղղությամբ համագործակցություն ծավալելու կարեւոր գրավական է համարել երկկողմ շփումները եւ փոխայցելությունները հայ եւ հնդիկ դեղարտադրող եւ ներմուծող ընկերությունների միջեւ:

Դերենիկ Դումանյանն իր խոսքում նաեւ ընդգծել է ապրիլին Մումբայում կայանալիք դեղագործական մեծ  ցուցահանդեսի կարեւորությունը` հավելելով, որ  ցուցահանդեսին կմասնակցեն նաեւ հայկական դեղարտադրողները:

Դեսպանը շնորհավորել է պատշաճ արտադրական գործունեության (GPM) հավաստագիր ստացած ընկերությանը: Նա նշել է, որ Հայաստանում GPM հավաստագրի տրամադրումը միջազգային շուկայում ակտիվ համագործակցության կարեւոր երաշխիք է:

«Երկկողմ համագործակցության  զարգացման նոր գրավական կարող է դառնալ   փետրվարի 2-4-ը  Հնդկաստանի Դեղերի արտահանումը խթանող խորհրդի պատվիրակության  այցը Հայաստան եւ նրանց հանդիպումը Հայաստանի դեղարտադրողների եւ դեղներմուծողների միության, ինչպես նաեւ շահագրգիռ այլ կառույցների հետ»,-ասել է Սուրեշ Բաբուն` նշելով, որ պատվիրակության մեջ ընդգրկված են լինելու 15-ից ավելի ընկերությունների ներկայացուցիչներ:

Կարեւորելով բժշկական կրթության եւ բժշկագիտության դերը` Սուրեշ Բաբուն առաջարկել է հնդկական ավանդական բժշկության եւ հոմեոպաթիայի անվճար դասընթացների կազմակերպում, ինչը հնարավորություն կտա ցանկացողներին ծանոթանալ  հնդկական ավանդական բժշկության գաղտնքիներին: Նշենք, որ այն մեծապես կարեւորվում է Հնդկաստանում: