նախընտրելի դարձնել
ԼՂՀ Սահմանադրական բարեփոխումների նախագծի վերաբերյալ ստացվել է շուրջ 200 առաջարկություն ու դիտողություն:
ԼՂՀ նախագահին առընթեր սահմանադրական բարեփոխումների մասնագիտական հանձնաժողովը հունվարի 12-ին հրավիրել է հերթական նիստը, որտեղ Հանձնաժողովի նախագահ Աշոտ Ղուլյանն ամփոփել է մինչ այս պահը հանձնաժողովի կատարած աշխատանքը, ընթացակարգով նախատեսված քայլերը եւ ներկայացրել հետագա անելիքները:
Նշենք, որ դեկտեմբերի 29-ին տեղի ունեցած ԱԺ լիագումար նիստում ընդմիջվել են Սահմանադրության նախագծի քննարկումները եւ պատգամավորներն ու խմբակցությունները հնարավորություն են ստացել մինչեւ հունվարի 11-ի աշխատանքային օրվա ավարտը ներկայացնել առաջարկություններ եւ դիտողություններ սահմանադրության նախագծի վերաբերյալ:
Աշոտ Ղուլյանի խոսքով, հանձնաժողովն այդ ընթացքում ստացել է շուրջ 200 առաջարկություն եւ դիտողություն:
«Ստացված առաջարկությունները սպասվածից բավականին շատ են եղել, ինչի համար շնորհակալ ենք հեղինակներին, քանի որ այդ ուղղորդումները մեզ օգնելու են ամբողջացնել Սահմանադրության նախագծի հետ կապված աշխատանքները»,- ընդգծել է Աշոտ Ղուլյանը:
Հանձնաժողովի անդամներն այնուհետեւ անցել են ստացված առաջարկությունների քննարկմանը, որից հետո, ըստ պատրաստվածության, նախանշվելու են հետագա քայլերը:
