նախընտրելի դարձնել
Գնումների ոլորտում գնացել ենք համարձակ քայլերի՝ մեծ ուշադրություն դարձնելով կոռուպցիայի դեմ պայքարի ոսկե կանոնի 3 սկզբունքների պահպանմանը. դրանք են՝ գործընթացների թափանցիկության եւ հրապարակայնության ապահովում, հաշվետվողականության եւ պատասխանատվության համար համակարգերի ներդրում, հասարակության իրազեկվածություն: Այս մասին, հունվարի 25-ին ՀՀ ֆինանսների նախարարությունում հասարակական կազմակերպությունների հետ հանդիպման ժամանակ նշել է ֆինանսների նախարար Վարդան Արամյանը:
Ֆիննախարարությունից NEWS.am-ին հայտնում են, որ հանդիպմանը ներկայացվեցին եւ քննարկվեցին ՀՀ ֆինանսների նախարարության կողմից իրականացված, ինչպես նաեւ 2017թ-ին նախատեսվող այն գործողություններն ու միջոցառումները, որոնք միտված են կոռուպցիոն դրսեւորումների բացահայտմանը, հակազդմանն ու կանխարգելմանը: Ներկայացվեց նաեւ «Իրավաբանների հայկական ասոցիացիա» ՀԿ-ի կողմից ս.թ. հունվարի 21-ին ՀՀ վարչապետի ղեկավարությամբ կայացած Կոռուպցիայի դեմ պայքարի խորհրդի նիստում քննարկված՝ ՀՀ ֆինանսների նախարարության կարգավորման ենթակա ոլորտներին առնչվող խնդիրների լուծման ամփոփաթերթը:
ՀՀ ֆինանսների նախարար Վարդան Արամյանը նշեց, որ կարճ ժամանակահատվածում ՀՀ ֆինանսների նախարարության կողմից պատրաստվել է ամփոփաթերթ, որով «Իրավաբանների հայկական ասոցացիա» ՀԿ-ի կողմից ներկայացված կարեւոր փաստաթղթով վեր հանված 36 խնդիրների վերաբերյալ ներկայացված են գերատեսչության դիրքորոշումները եւ ընդունելի կետերի մասով կատարման կարգավիճակները:
Ըստ այդմ՝ բարձրացված խնդիրների մասով նյութում տեղ գտած 36 առաջարկից 18-ը կատարված է: Թվով 6 առաջարկ ընդունելի չէ եւ կատարման ընթացքում է. դրանք արտացոլված են կառավարության ծրագրում, նախարարության գերակա խնդիրներում եւ միջոցառումների ցանկում: 4 առաջարկ ընդունելի չէ, սակայն այն առումով, որ բարձրացված խնդիրների մասով ռիսկերի նվազեցման այլ գործիքներ են սահմանվել, 1 առաջարկ լրացուցիչ քննարկման կարիք ունի, 7 առաջարկ ավելի լայն է ներկայացված եւ գնումների ոլորտից դուրս է:
Արամյանի խոսքով իր ղեկավարած գերատեսչությունը խիստ կարեւորում է կոռուպցիայի դեմ պայքարը եւ գործուն քայլեր է ձեռնարկում այդ ուղղությամբ՝ ապահովելով թե՛ գործունեության թափանցիկությունը եւ թե՛ շահերի բախման ինստիտուտների առկայությունն ու կիրառությունը:
Քննարկմանը ներկայացվեցին նաեւ պետական գնումների ոլորտում իրականացված հակակոռուպցիոն գործողությունները: Մասնավորապես՝ պետական ներքին ֆինանսական հսկողության եւ պետական գնումների մեթոդաբանության վարչության պետ Սերգեյ Շահնազարյանն ընդգծեց պետական գնումների ոլորտում իրականացված բարեփոխումները, որոնք կառուցված են գնումների գործընթացում իրականացվող բոլոր գործողությունները եւ կայացվող որոշումները ցանկացած անձի համար տեսանելի լինելու, բողոքարկելու եւ փոփոխելու սկբունքով: Նա կարեւորեց 3 հիմնական բարեփոխում. նախ՝ ներդրվել են մասնակիցների` իրենց փոխկապակցված այլ մասնակիցների հետ տվյալ գնման ընթացակագին միաժամանակ մասնակցելու հնարավորությունը բացառող, մասնակիցների՝ իրական սեփականատերերի բացահայտման, ինչպես նաեւ գործընթացներում որոշումներ կայացնող պաշտոնյաների կողմից գնման մասնակիցների հետ շահերի բախման դեպքերի բացահայտման համակարգեր: Ապա՝ բարձրացվել է գնումների համակարգի թափանցիկության աստիճանը, որի արդյունքում հրապարակվելու են մասնակիցների հայտերը եւ շահերի բախման բացակայության մասին հայտարարությունները, ինչը հանրությանը հնարավորություն է ընձեռում՝ գնահատելու դրանց արժանահավատությունը, իսկ անարժանահավատ տեղեկությունների հայտնաբերման դեպքում նախատեսվում են կիրառվել համապատասխան պատժամիջոցներ: Եվ վերջապես, համակարգում իրականացվել են ֆունկցիոնալ եւ ինստիտուցիոնալ փոփոխություններ, որոնք ուղղված են գնման ընթացակարգերի կազմակերպման պայմանների հստակեցմանը, մրցակցության աստիճանի բարձրացմանը, էլեկտրոնային գնումների համակարգի ընդլայնմանը եւ արտադատական բողոքարկման անկախ եւ գործունակ համակարգի ձեւավորմանը:
Հանդիպման ավարտին նախարար Արամյանը նշեց, որ առաջիկայում եւս կկազմակերպվեն նմանատիպ այլ հանդիպումներ, որտեղ կքննարկվեն «հստակ եւ չափելի» առաջարկներ՝ միաժամանակ իր գոհունակությունը հայտնելով քննարկման մասնակից ՀԿ-ներին նախաձեռնությունների եւ համագործակցության համար:
