ՀՀ քննչական կոմիտեի Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում ձեռնարկված քննչական եւ դատավարական այլ գործողությունների արդյունքում բացահայտվել է Աջափնյակում տեղի ունեցած գողության դեպք, կասկածյալները ձերբակալվել են:

2018թ. հուլիսի 31-ին Երեւան քաղաքի բնակչից հաղորդում է ստացվել Աջափնյակ վարչական շրջանի տարածքում գտնվող իր բնակարանից կատարված գողության մասին։

Նույն օրը ՀՀ ՔԿ ԵՔՔՎ Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 177-րդ հոդվածի 3-րդ մասի 1.1 կետով, եւ ձեռնարկվել անհրաժեշտ միջոցառումներ՝ դեպքի հանգամանքները պարզելու, ենթադրյալ հանցագործություն կատարած անձին (անձանց) հայտնաբերելու ուղղությամբ:

Օպերատիվ-հետխուզական ստորաբաժանումների հետ համատեղ իրականացված գործողությունների արդյունքում փաստական տվյալներ են ձեռք բերվել առ այն, որ քաղաքացու բնակարանից առերեւույթ կատարված գողությանը մասնակցություն է ունեցել 2 անձ, պարզվել նրանց ինքնությունը։

2018թ. օգոստոսի 1-ին խուզարկություն է կատարվել նրանց բնակության վայրերում, ինչպես նաեւ` նրանցից մեկի «ՎԱԶ 2109» մակնիշի ավտոմեքենայում: Նշված ավտոմեքենայում կատարված խուզարկության արդյունքում հայտնաբերվել է գողոնը։ Բացի այդ, հայտնաբերվել է  թմբուկավոր ատրճանակ՝ լիցքավորված 7 հատ փամփուշտով, ինչպես նաեւ` բանալիներ, տարբեր գործիքներ, որոնք ենթադրաբար օգտագործվել են բնակարանային գողությունը կատարելու համար։ 

Կասկածյալները ձերբակալվել են։

Քրեական գործի նախաքննությունը շարունակվում է:

Լուսանկարում՝ գողոնը եւ գողությունը կատարելու համար օգտագործված գործիքները