նախընտրելի դարձնել
Հանքարդյունաբերության ռազմավարության մշակման հիմնական պատճառը տնտեսության մեջ հանքարդյունաբերության ոլորտի հստակ տեղն ու դիրքն ընդգծելն էր։ Այս մասին ոլորտի ներկայացուցիչների հետ փաստաթղթի շուրջ կլոր սեղան քննարկման ընթացքում նշեց Տեղական կառավարման և ենթակառուցվածքների փոխնախարար Հովհաննես Հարությունյանը։
«Բոլոր ուսումնասիրությունները ցույց էին տալիս, որ այս պահի դրությամբ հնարավոր չէ գնահատել ոլորտը, ոլորտից ստացված օգուտները, և այն սպասելիքները, որ կարող են դրվել ոլորտի համար որպես նպատակներ: Այդ ամբողջ տեղեկությունը վերլուծելուց հետո խնդիր դրվեց, որ ոլորտը, ինչպես մյուսները, պետք է ունենա ռազմավարություն»,- ասաց նա:
Հարությունյանի խոսքով՝ չնայած ռազմավարություներն ունենում են հստակ ցուցանիշներ, ժամկետներ և արդյունքներ, բայց հաշվի առնելով, որ հանքարդյունաբերության ոլորտը չունի ռազմավարություն՝ որոշվել է, որ առաջին նման փաստաթուղթը լինի ավելի ընդհանրական և ամբողջացնի ոլորտում կատարվելիք քայլերը։
«Կառավարությունն ունի անելիքներ, նախանշել է ժամանակահատված և պատրաստվում է նոր ստանդարտների հետ կապված որոշումներ կայացնել, որոնք կներդրվեն ոլորտում, որպեսզի կարողանանք կառավարել ինչպես բնապահպանական, առողջապահական, սոցիալական, այնպես էլ ընդերքի ռացիոնալ օգտագործման հարցերը»,- ասաց փոխնախարարը։
Կառավարության կարծիքով՝ եղած փաստաթուղթը 2035 թվականն ընդհանրական աշխատանքներ իրականացնելու համար պատրաստի փաստաթուղթ է, սակայն ինչպես այլ փաստաթղթեր, կարող է արժանանալ քննադատության։
«Մենք չենք վախենում այդ քննադատություններից, պատրաստ ենք աշխատանքների ընթացքում լսել բոլոր դիտարկումները, եթե կա անհրաժեշտություն, ընթացքում ինչ-որ մի բան ավելի կոնկրետացնել»,- նշեց Հարությունյանը։
