նախընտրելի դարձնել
Մեծ Բրիտանիայում հայտնաբերված հռոմեական մետաղադրամը, որը համարվում է իր տեսակի մեջ առաջինը, աճուրդում վաճառվել է գրեթե 5000 ֆունտ ստեռլինգով, հայտնում է BBC News-ը։
Քինգսվինֆորդից 76-ամյա Ռոն Ուոլթերսը մետաղադրամը գտել է իր մետաղական դետեկտորի միջոցով անցյալ տարի Դադլիի մոտ գտնվող Ուոլ Հիթում:
Սթուրբրիջի Fieldings աճուրդի տան ներկայացուցիչ Մարկ Հաննամը հայտնել է, որ ուրբաթ մետաղադրամը գնել է շոտլանդացի կոլեկցիոները 4700 ֆունտ ստեռլինգով:
«Թեև այն հողի մեջ է եղել ավելի քան 1900 տարի, նա շատ ոգևորված է այն ավելացնելով իր հավաքածուին», - ասել է Հաննամը:
Ենթադրվում է, որ այս մետաղադրամը, որը թվագրվում է մ.թ. 69 թվականին, իր տեսակի մեջ միակն է Բրիտանական կղզիներում:
Այն պատկերում է Ավլուս Վիտելիուս կայսրին, ով թագավորել է ընդամենը ութ ամիս քաղաքացիական պատերազմի ժամանակ, որը հայտնի է որպես Չորս կայսրերի տարի։
«Մ.թ. 69 թվականի մետաղադրամ գտնելն աներևակայելի հազվադեպ է: Մետաղադրամների մեծ մասը, որոնք մենք գտնում ենք այս երկրում, թվագրվում են երրորդ և չորրորդ դարերի, և մենք խոսում ենք մի ժամանակաշրջանի մասին, երբ ոսկին ամենալավ որակն ուներ», - նշել է Հաննամը:
