Կոլումբիայի նախագահի թեկնածուն երեք գնդակ է ստացել, ենթադրաբար՝ երկուսը գլխին, երկրի մայրաքաղաք Բոգոտայում տեղի ունեցած նախընտրական միջոցառման ժամանակ, հայտնում է BBC News-ը։

39-ամյա Միգել Ուրիբե Տուրբայը հարձակման է ենթարկվել շաբաթ օրը այգում փոքր բազմության առջև ելույթ ունենալու ժամանակ։

Տեղական լրատվամիջոցները հայտնում են, որ ոստիկանությունը հանցագործության վայրում ձերբակալել է 15-ամյա կասկածյալի։

Ուրիբեի Centro Democratico կուսակցությունը դատապարտել է հարձակումը՝ հայտարարելով, որ այն «վտանգի տակ է դնում քաղաքական առաջնորդի կյանքը... ժողովրդավարությունն ու ազատությունը Կոլումբիայում»։

Բուժաշխատողները հայտնել են, որ նա վիրավորվել է ծնկից և երկու անգամ՝ գլխից, հաղորդում է AFP գործակալությունը։ Նրան օդային ճանապարհով տեղափոխել են Սանտե-Ֆե կլինիկա, որտեղ շենքի մոտ հավաքվել են նրա կողմնակիցները՝ գիշերային հսկողություն կազմակերպելու համար։

Երկրի նախագահ Գուստավո Պետրոյի կառավարությունը հայտարարել է, որ «կտրականապես և վճռականորեն» դատապարտում է հարձակումը՝ այն որակելով «բռնության ակտ ոչ միայն նրա անձի, այլև ժողովրդավարության դեմ»։

ԱՄՆ պետքարտուղար Մարկո Ռուբիոն նույնպես դատապարտել է հրաձգությունը՝ այն որակելով «ուղիղ սպառնալիք ժողովրդավարությանը»։

Ուրիբեն հայտարարել էր հաջորդ տարվա հոկտեմբերին կայանալիք նախագահական ընտրություններում իր թեկնածությունն առաջադրելու մասին։

Նա պատկանում է Կոլումբիայի հայտնի քաղաքական ընտանիքներից մեկին, որը կապված է երկրի Լիբերալ կուսակցության հետ։ Նրա հայրը եղել է արհմիութենական առաջնորդ և գործարար։

Նրա մայրը լրագրող Դիանա Տուրբայն է, որը սպանվել է 1991 թվականին՝ Մեդելյինի նարկոկարտելի կողմից առևանգվելուց հետո նրան փրկելու փորձի ժամանակ։ Այն ժամանակ կարտելը ղեկավարում էր Պաբլո Էսկոբարը։