Նախընտրելի
Ճապոնիայի հարավում գտնվող ափամերձ քաղաքում կրակը պատել է ավելի քան 170 շենք, որոնք այրվել են ողջ գիշեր և դեռ ամբողջությամբ չեն մարվել, հայտնում է Reuters-ը՝ հղում անելով երկրի հրշեջ գործակալությանը։
Տոկիոյից մոտ 770 կմ հարավ-արևմուտք գտնվող Օիտայի Սագանոսեկի շրջանի մոտ 175 բնակիչ փախել է արտակարգ ապաստարան՝ երեքշաբթի օրը, ժամը 17:40-ի սահմաններում բռնկված հրդեհից հետո, հայտնել է Հրդեհների և աղետների կառավարման գործակալությունը։
Հաղորդագրության համաձայն՝ մեկ մարդ անհետ կորած է համարվում, իսկ հրդեհի պատճառները դեռ պարզվում են։
Տեղական հեռուստաընկերությունների կողմից երկնքից արված տեսագրության մեջ երևում է, թե ինչպես են տները վերածվել ավերակների և ինչպես են ծխի խիտ շերտեր բարձրանում բլրապատ քաղաքի վրայով, որտեղից բացվում է ձկնորսական նավահանգստի տեսարանը, որը հայտնի է իր «Սեքի» ապրանքանիշի բարձրորակ սկումբրիայով:
Տեղական լրատվամիջոցները հաղորդում են, որ կրակը տարածվել է նաև մոտակա անտառապատ լանջերին: Օիտա պրեֆեկտուրայի նահանգապետի խնդրանքով ուղարկվել է ռազմական հրշեջ ուղղաթիռ, հայտարարել է Ճապոնիայի վարչապետ Սանաե Տակաիչին X-ում հրապարակված գրառման մեջ:
