Պաշտոնյաների վկայությամբ, ԱՄՆ Տեխաս նահանգի Հյուսթոն քաղաքի շրջանում ավելի քան 100 տուն է վնասվել, երբ սառը մթնոլորտային ճակատի ուժեղ քամիների ֆոնին առնվազն մեկ պտտահողմ հարվածել է տարածքին, հայտնում է NBC News-ը։

Տվյալ տարածքը ներկայացնող շրջանային կոնստեբլ Մարկ Հերմանը Facebook-ի իր էջում հայտնել է, որ վնասված բնակելի տները գտնվում են Հարիս շրջանի Մեմորիալ-Նորթվեսթ հատվածում։

NBC News-ի հրապարակած լուսանկարներում երևում է, որ Մեմորիալ-Նորթվեսթից դեպի արևմուտք գտնվող Սայ-Ֆեյր բնակավայրում պոկվել է տների երեսպատումը, և բեկորներ են թափվել։ Ըստ արտակարգ իրավիճակների և Ազգային օդերևութաբանական ծառայությունների ներկայացուցիչների, Սփրինգում վնասվել են շրջանային շտապօգնության ծառայության շենքը և Կլայնի հրշեջ պահպանության համեմատաբար նոր վարչական շենքը, սակայն աշխատակիցները կարողացել են արձագանքել օգնության կանչերին։

Զոհերի կամ լուրջ վնասվածքների մասին հաղորդումներ չեն ստացվել։

«Հաղորդումներ են ստացվում Հարիսի հյուսիս-արևմտյան շրջանի որոշ հատվածներում վնասված կառույցների, տապալված ծառերի և գազատարների խզման մասին»,- ասել է շերիֆ Էդ Գոնսալեսը։

Ըստ CenterPoint Energy-ի, փոթորկի թեժ պահին Հյուսթոնի շրջանում մոտ 28 000 բաժանորդ մնացել էր առանց էլեկտրականության, սակայն երկուշաբթի օրվա վերջում հոսանքազրկված էր ընդամենը մոտ 4000-ը։

Դիկինսոնում Ազգային օդերևութաբանական ծառայության վարչությունը հայտնել է, որ նախնական հաստատում է տալիս տարածքում երկու հավանական պտտահողմերից մեկի վերաբերյալ՝ սպասելով երեքշաբթի նախատեսված տեղազննմանը։ Վարչությունը հրապարակել է հետագծի նախնական քարտեզը՝ տեղական ժամանակով 16:24 ժամային նշումով։

Դիկինսոնի գրասենյակից հայտնել են, որ երկրորդ՝ չհաստատված պտտահողմը, հնարավոր է, հարվածել է Ուոլեր շրջանին, որը նույնպես գտնվում է Հյուսթոնից հյուսիս-արևմուտք։ Դաշնային օդերևութաբանները հայտարարել են, որ տարածաշրջանում հողմապտույտներն ու ավերիչ քամիները արդյունք են դեպի արևելք շարժվող սառը ճակատի և Մեքսիկական ծոցի տաք օդի բախման, ինչը նպաստում է ամպրոպների արագ տարածմանը և օդի անկայունությանը, որը կարող է վերածվել պտտահողմի։

Ըստ նրանց, երկուշաբթի երեկոյան փոթորիկը դադարել է և, ամենայն հավանականությամբ, երեքշաբթի իր տեղը կզիջի պարզ երկնքին ու մոտ 80 աստիճան (ըստ Ֆարենհայթի) տաքությանը, նախքան «ուժգնացող» սառը ճակատը կրկին կանցնի և կնվազեցնի ջերմաստիճանը Գոհաբանության օրվան ընդառաջ։