Անցյալ տարի աշխարհում յուրաքանչյուր 10 րոպեն մեկ մի կին է զոհվել իր մտերիմի ձեռքով, երկուշաբթի հայտարարել է Միավորված ազգերի կազմակերպությունը, հաղորդում է AFP-ն։
Ըստ ՄԱԿ-ի Թմրամիջոցների և հանցավորության դեմ պայքարի գրասենյակի և «ՄԱԿ-կանայք» կառույցի զեկույցի, որը հրապարակվել է Կանանց նկատմամբ բռնության վերացման միջազգային օրվա առթիվ, 2024 թվականին զուգընկերները կամ ընտանիքի անդամները սպանել են շուրջ 50 000 կնոջ և աղջկա։
Զեկույցում նշվում է, որ ամբողջ աշխարհում սպանված կանանց 60 տոկոսը զոհվել է զուգընկերների կամ ազգականների՝ հայրերի, հորեղբայրների կամ քեռիների, մայրերի և եղբայրների ձեռքով։ Համեմատության համար՝ սպանության զոհ դարձած տղամարդկանց 11 տոկոսն է սպանվել մտերիմներից որևէ մեկի կողմից։
Ըստ զեկույցի, 117 երկրի տվյալների վրա հիմնված 50 000 թիվը կազմում է օրական 137 կին կամ մոտավորապես մեկ կին՝ յուրաքանչյուր 10 րոպեն մեկ։
Փաստաթղթի համաձայն, ընդհանուր ցուցանիշը փոքր-ինչ ցածր է 2023 թվականին ներկայացված տվյալներից, սակայն դա չի վկայում իրական նվազման մասին, քանի որ մեծապես պայմանավորված է տարբեր երկրներում տվյալների հասանելիության տարբերություններով։
«Ամեն տարի ֆեմիցիդը շարունակում է խլել տասնյակ հազարավոր կանանց և աղջիկների կյանքեր, և իրավիճակի բարելավման ոչ մի նշան չկա, իսկ տունը շարունակում է մնալ ամենավտանգավոր վայրը կանանց և աղջիկների համար՝ սպանության ռիսկի տեսանկյունից»,- նշված է հետազոտության մեջ։
Աշխարհի ոչ մի տարածաշրջան զերծ չի մնացել ֆեմիցիդի դեպքերից, սակայն անցյալ տարի Աֆրիկայում կրկին գրանցվել են ամենամեծ թվով դեպքերը՝ մոտ 22 000, ասվում է զեկույցում։
Նշվում է նաև, որ տեխնոլոգիաների զարգացումը սրել է կանանց և աղջիկների նկատմամբ բռնության որոշ տեսակներ և ծնել նորերը, ինչպիսիք են առանց համաձայնության պատկերների տարածումը, դոքսինգը և կեղծ տեսանյութերը։
նախընտրելի դարձնել
