Երբ հաշվի են առնում ֆիզիկական ակտիվության մակարդակը, հաճախ ներառում են նաեւ տնային գործերի հետ առնչվող ակտիվությունը, սակայն, համաձայն վերջին հետազոտությունների, դա սխալ է, նշում է BBC-ին: Այս տեսակետից քչերն են շաբաթվա ընթացքում գրանցում բժիշկների խորհուրդ տված 150 րոպե ֆիզիկական ակտիվությունը:
4500 մարդու շրջանում անցկացված հարցումը ցույց է տվել, որ այն մարդիկ, ովքեր տնային գործը համարում էին ֆիզիկական ակտիվություն, ավելի ծանր քաշ ունեին, քան նրանք, ովքեր այդ կարծիքին չէին: Իրականում, հաշվի պետք է առնել միայն այն գործունեությունը, որն արագացնում է սրտի աշխատանքն ու ստիպում է հաճախակի շնչել, հաղորդում է MedDaily.ru-ն:
Հարցման մասնակիցները պատմել են, թե ինչով են զբաղվում տանը, ինչ կենսակերպ են վարում: Պարզվել է, որ 10 եւ ավելի րոպե տեւողությամբ տնային գործերը 36 տոկոսը վերագրում էին ակտիվությանը: Սակայն երբ հետազոտողները վերլուծել են մարդկանց քաշն ու հասակը, պարզվել է, որ կանանց միայն 5 տոկոսն է ունեցել շաբաթական անհրաժեշտ ակտիվության ցուցանիշը, եթե բացառում էին տնային գործերը: Մասնագետների խոսքով՝ մարդկանց քաշն ավելի էր, հավանաբար, այն պատճառով, որ գերագնահատում էին էներգիայի ծախսը, կամ այն լրացնելու համար չափից ավել էին սնվում: