Այս սահմանափակումները, որոնք արդեն կիրառելի են՝ ուսուցիչների, բուժաշխատողների համար չափազանց կարեւոր նորություն են։ Այս մասին մարտի 15-ին՝ ԱԺ Պետական-իրավական եւ մարդու իրավունքների պաշտպանության հարցերի մշտական հանձնաժողովում «Հայաստանի Հանրապետության ընտրական օրենսգիրք» սահմանադրական օրենքում փոփոխություններ եւ լրացումներ կատարելու մասին» նախագծի քննարկման ժամանակ հայտարարել է հանձնաժողովի նախագահ, Հանրապետական կուսակցության պատգամավոր Գեւորգ Կոստանյանը։
Նրա խոսքով, այսպիսի սահմանափակումներ նախկինում չեն եղել. «Նախկինում որոշակի սուբյեկտներ իրավունք չունեին քարոզչություն իրականացնել ծառայողական պարտականությունները կատարելիս: Այո՛, հարց էր առաջանում՝ ծառայողական պարտականությունների կատարումն աշխատաժամի մեջ է, թե ինչպես»:
Նրա հավաստմամբ՝ այժմ ավելացվել է կարեւոր ճշգրտում՝ ի պաշտոնե հանդես գալիս, այսինքն՝ ուսուցչին, բուժաշխատողին արգելվում է ծառայողական պարտականություններ կատարելու ժամանակահատվածում, անգամ դրանից դուրս, ի պաշտոնե քարոզչությամբ հանդես գալ։
Նշենք, որ այս նախագիծը առաջարկում է խստորեն սահմանափակել վարչական ռեսուրսի օգտագործումը նախընտրական քարոզչության ընթացքում ոչ միայն թեկնածուների, այլ նաեւ պետական ծառայողների կողմից: Արգելվում է օգտագործել հանրային եւ ծառայողական տրանսպորտը, բյուջետային միջոցները, տարածքները, կապի, տեղեկատվության միջոցները, ինչպես նաեւ այլ նյութական եւ մարդկային ռեսուրսներ:
Բացի դրանից, նախընտրական քարոզչությանը մասնակցել խստորեն կարգելվի դատավորներին, իրավապահ մարմինների աշխատակիցներին, դատախազներին, քննիչներին, Ազգային անվտանգության ծառայության աշխատակիցներին, ընտրական հանձնաժողովների, Հեռուստատեսության եւ ռադիոյի ազգային հանձնաժողովի անդամներին, Մարդու իրավունքների պաշտպանն:
Նախագիծն առաջին ընթերցման ներկայացնելու համար քվեարկությանը «Ծառուկյան» խմբակցության 4 անդամները ձեռնպահ քվեարկեցին: