Ես պաշտոնապես հայտարարում եմ, որ ռուս քաղաքագետ Ալեքսանդր Դուգինի հայտարարությունները բացահայտ զառանցանք, անհեթեթություն եւ սուտ են՝ վճարված Բաքվի նավթադոլարներով: Այս մասին հայտարարել է ՀՀ ԱԺ փոխխոսնակ, ՀՀԿ մամուլի քարտուղար Էդուարդ Շարմազանովը:
Նրա խոսքով, Դուգինի պնդումը, որը հայկական քաղաքական համայնքի որոշ ներկայացուցիչներ պաշտպանել են, ակնհայտ սուտ է: «Սերժ Սարգսյանը (Հայաստանի Հանրապետական կուսակցության ղեկավար, Հայաստանի երրորդ նախագահ) միշտ կողմ է եղել ղարաբաղյան հարցի արդարացի լուծմանը, նա միշտ հաշվի է առել Հայաստանի եւ Արցախի շահերը, եւ նման հայտարարությունները անբարոյական եւ անհեթեթ են», - շեշտել է նա՝ ասելով, որ նման խոսակցություն երբեք չի եղել եւ չէր կարող լինել:
Պատասխանելով Ադրբեջանի իշխանությունների կողմից ռուս քաղաքագետների եւ փորձագետների համար Ադրբեջան կազմակերպված ուղեւորության մասին, Շարմազանովը նշել է, որ դա Բաքվի հերթական շոուն է, որը նպատակ ունի ցույց տալ, որ Մոսկվան իբրեւ թե ադրբեջանամետ դիրքորոշում է զբաղեցնում, բայց բնականաբար, նման բան չկա:
«Դա Բաքվի հերթական քարոզչական հնարքն է», -ասել է նա՝ հիշեցնելով, որ բազմաթիվ ռուս քաղաքագետներ եւ փորձագետներ բազմիցս այցելել են Ստեփանակերտ: Նա Հայաստանի եւ Արցախի իշխանություններին կոչ է արել զգոնություն եւ զգուշություն ցուցաբերել, որպեսզի Ալիեւի (Ադրբեջանի նախագահ-խմբ.) ջրաղացին ջուր չլցնեն:
Շարմազանովը նշել է, որ Հայաստանի նոր իշխանությունները պետք է ամեն ինչ անեն ղարաբաղյան հակամարտության քաղաքական որոշումն ապահովելու համար:
«Հարկավոր է գործընթացը կառուցողական հուն վերադարձնել: Վտանգի տակ են Հայաստանի եւ Արցախի ապագան: Բանակի արդիականացման հետ մեկտեղ անհրաժեշտ են դիվանագիտական ջանքեր», - նշել է նա:
