Եվրոպական ֆոնդային շուկաները ուրբաթ օրը փակվել են դրական տիրույթում

Արևմտյան Եվրոպայի երկրների ֆոնդային ինդեքսներն ուրբաթ օրվա առևտրաշրջանն ավարտել են աճով՝ նավթի գների անկման ֆոնին։

Տարածաշրջանի խոշորագույն ընկերությունների Stoxx Europe 600 համախմբված ինդեքսն ավելացել է 0,49%-ով՝ հասնելով 639,1 կետի։

Բրիտանական FTSE 100-ն աճել է 0,39%-ով, գերմանական DAX-ը՝ 0,82%-ով, ֆրանսիական CAC 40-ը՝ 0,78%-ով, իտալական FTSE MIB-ը՝ 1,36%-ով, իսկ իսպանական IBEX 35-ը՝ 0,91%-ով։

Ներդրողները շարունակում են վերլուծել Եվրոպական կենտրոնական բանկի (ԵԿԲ) հինգշաբթի կայացած նիստի արդյունքները, որտեղ կարգավորիչը, ինչպես և սպասվում էր, հիմնական տոկոսադրույքները բարձրացրեց 25 բազիսային կետով։

Կարգավորիչը նաև զգուշացրել է, որ Մերձավոր Արևելքում ընթացող հակամարտության պատճառով եվրագոտում տեղի ունեցող գնաճը երկար ժամանակ կպահպանվի թիրախային 2%-ային մակարդակից բարձր սահմաններում։

Ուրբաթ օրը գնաճի վերաբերյալ թարմ տվյալներ է հրապարակել նաև ԱՄՆ կառավարությունը։ Ըստ դրանց՝ օգոստոսին երկրում գնաճը պահպանվել է հուլիսյան 3,4% մակարդակում՝ համընկնելով շուկայի սպասումների հետ։

Stoxx 600-ի կազմում աճի առաջատարների թվում են Infineon Technologies (+5%), Universal Music Group (+4,2%), Logitech (+3,5%), Nokia Corp. և Thyssenkrupp AG (+3,4%՝ երկուսն էլ) ընկերությունները։

Համախմբված ինդեքսում ամենամեծ անկումն արձանագրած ակտիվներից են Lanxess (-4,9%), Norsk Hydro (-3,8%), Barry Callebaut (-3,7%), Novo Nordisk (-3,4%), London Stock Exchange Group և K+S (-3,2%՝ երկուսն էլ) ընկերությունները։

Alstom SA-ի բաժնետոմսերն թանկացել են 2,4%-ով։ Դա կապված է եղել այն լուրերի հետ, որ գնացքների ֆրանսիական արտադրողն ավելի քան 1,2 միլիարդ եվրոյի պայմանագրեր է ստացել բրիտանական TransPennine Express օպերատորին նոր էլեկտրագնացքների մատակարարման և երկարաժամկետ տեխնիկական սպասարկման համար։

Աճել է նաև թանկարժեք իրեր արտադրող ընկերությունների շուկայական արժեքը․ Moncler (+2,5%), LVMH և Kering (+1,9%՝ երկուսն էլ)։ Hermes-ի ցուցանիշը, ընդհակառակը, նվազել է 0,7%-ով։

Կիսահաղորդիչների ոլորտի ASM International-ի կապիտալիզացիան ավելացել է 1,2%-ով, STMicroelectronics-ինը՝ 2,4%-ով, BE Semiconductor Industries-ինը՝ 2,8%-ով, ASML Holding-ինը՝ 0,3%-ով։

Դեղագործական ոլորտը առևտրաշրջանն ավարտել է բացասական տիրույթում․ GSK-ի արժեթղթերի գնանշումները նվազել են 0,3%-ով, Roche-ինը, Sanofi-ինն ու AstraZeneca-ինը՝ 0,4%-ով, Novartis-ինը՝ 0,1%-ով, Bayer-ինը՝ 1,1%-ով, Merck KGaA-ինը՝ 0,2%-ով։