NEWS.am-ի տեղեկություններով՝ մայր եւ որդի ծեծել են կահույքի արտադրամասի տնօրենին՝ պատվերը ուշացնելու համար: NEWS.am-ի այս տեղեկությունը հատաստեցին նաեւ ոստիկանության լրատվական ծառայությունից:

Դեկտեմբերի 26-ին ոստիկանության Երեւան քաղաքի վարչության օպերատիվ  կառավարման կենտրոնից հաղորդվել է, որ անհայտ քաղաքացին ահազանգել եւ հայտնել է, որ Եղիշե Թադեւոսյան փողոցի թիվ 4 շենքի նկուղում վիճաբանություն է տեղի ունենում: Մեկնած օպերատիվ խումբը  նշված տեղից բաժին է հրավիրվել Արամ Վ-ն, ով ըստ NEWS.am-ի տեղեկությունների,  կահույքագործ անհատ ձեռներեց է:

Վերջինս  հաղորդում է  տվել այն մասին, որ նույն օրը, ժամը 21.25-ի սահմաններում, նշված նկուղ են ներխուժել կահույքի  պատվիրատուներ Անիկը եւ վերջինիս որդի Արթուրը: Նրանք դժգոհել են կահույքի  պատրաստման ժամկետների  ուշացումից, հարձակվել են իր վրա եւ  ձեռքերով ու ոտքերով հարվածներ են հասցրել  գլխի, դեմքի եւ մարմնի տարբեր մասերին պատճառելով վնասվածքներ:

Նշանակվել է դատաբժշկական փորձաքննություն , ձեռնարկվել են միջոցառումներ Անիկին եւ Արթուրին հայտնաբերելու ուղղությամբ: