Եգիպտոսում խիստ շոգից մահացածների թիվը հասել է  40-ի, հաղորդում է «Ալ Ահրամ» թերթը՝ վկայակոչելով երկրի Առողջապահության նախարարությանը։ Մինչ այդ հաղորդվել էր  ավելի քան 20 զոհի մասին։

Հայտնել են, որ միայն Կահիրեում վերջին օրերին մահացել է  11 մարդ։ Երկուշաբթի օրը մայրաքաղաքում ջերմաչափի սնդիկի սյունը գերազանցել է  37 աստիճանն ըստ Ցելսիուսի, փոխանցում է «ՌԻԱ Նովոստին»։

Առողջապահության նախարարության հայտարարության համաձայն, եւս երեք մարդ մահացել է հիվանդանոցում՝ Կալյուբիա նահանգում, երեքն էլ՝ հարավային Սոհագ նահանգում։  Լուքսորում եւ Գիզայում մեկական մարդ է մահացել։

Երկրի հիվանդանոցներ է տեղափոխվել ընդհանուր հաշվով  92 մարդ, որից  70-ը դիմել է Կահիրեի բուժհաստատություններ։ Առողջապահության նախարարությունը քաղաքացիներին խորհուրդ է տվել արեւի տակ դուրս չգալ տնից, փողոցում գլխարկ կրել եւ ավելի շատ հեղուկ խմել։

Օդերեւութաբանների տեղեկությունների համաձայն, երկրի մի քանի շրջանում ջերմաստիճանի ցուցանիշները նորման գերազանցում են  4-5 աստիճանով։ Խոնավության բարձր աստիճանն ավելի է բարդացնում վիճակը։ Օդերեւութաբանական ծառայության մամլո քարտուղարը հաղորդել է, որ նման եղանակը կարող է պահպանվել մինչեւ օգոստոսի կեսերը։