նախընտրելի դարձնելԱֆղանստանի Քանդահար նահանգի հարավային հատվածում ուժեղացվել են անվտանգության միջոցառումները՝ կապված խորհրդարանական ընտրությունների անցկացման հետ, որոնք մեկ շաբաթով հետաձգվել էին էլիտար թիկնապահի վրա հարձակման պատճառով, որի հետեւանքով սպանվել էին երկրի կառավարության 2 ներկայացուցիչ, այդ թվում՝ ոստիկանության ղեկավարը, փոխանցում է Associated Press-ը:
Անկախ ընտրական հանձնաժողովի ներկայացուցիչ Ազիզ Իբրահիմին գործակալությանը հայտնել է, որ ավելի քան 1000 ընտրական տեղամասերում քվեարկությունը մեկնարկել է տեղական ժամանակով առավոտյան 7-ին: Ընտրողները պետք է 111 թեկնածուներից 11 խորհրդարանականի ընտրեն:
Քանդահարի նահանգապետի ներկայացուցիչը հայտնել է, որ ուրբաթից լիակատար անվտանգություն ապահովելու համար նահանգի բոլոր հիմնական ճանապարհները փակվել են բոլոր տեսակի փոխադրամիջոցների համար: Ճանապարհները կբացվեն միայն քվեարկության ավարտից հետո՝ 16:00-ին:
Հաղորդվում է, որ Աֆղանստանում անցկացված ընտրությունների նախնական արդյունքները կհրապարակվեն նոյեմբերի կեսից ոչ շուտ:
Հիշեցնենք, որ հոկտեմբերի 20-ին եւ 21-ին Աֆղանստանում ընթացող խորհրդարանական ընտրությունների ընթացքում շուրջ 200 հարձակման հետեւանքով զոհվել է մոտ 50 մարդ:
