Հոլանդիայում մետաղորսիչներով երկու գանձ որոնողներ հայտնաբերել են առաջին դարի ոսկյա և արծաթյա մետաղադրամների պաշարներ՝ հայտնում է Live Science-ը։

Հռոմեական և բրիտանական փողերի հազվագյուտ հավաքածուի մետաղադրամներին պատկերված են Հռոմում, Անգլիայում և Աֆրիկայում իշխող կայսրերի և թագավորների դիմանկարները: 404 մետաղադրամները հայտնաբերվել են 2023 թվականի աշնանը Բաննիկ քաղաքում, որը գտնվում է Ամստերդամից մոտավորապես 9 կմ հարավ-արևելք: Հազվագյուտ հավաքածուն ձեռք է բերել Նիդեռլանդների հնությունների ազգային թանգարանը, որը վերջերս այն ներկայացրել է «Նիդեռլանդները հռոմեական ժամանակներում» խորագրով ցուցահանդեսում։

Այս մետաղադրամներից շատերը դրոշմվել են մ.թ. 46-ից 47 թվականներին՝ Հռոմեական Կլավդիոս կայսրի օրոք։ Այս ժամանակաշրջանում Հռոմեական կայսրության հյուսիսային սահմանը Հռենոս գետն էր, որտեղ հռոմեական զորքերը տեղակայված էին գերմանական ցեղերի հարձակումները ետ մղելու և Բրիտանիայի ուղղությամբ արշավելու համար։

Ավելի քան 400 մետաղադրամներից 116-ը ոսկի էին։ Այս ոսկե մետաղադրամների թվում են 72 հռոմեական աուրեա, որոնք թվագրվում են մ.թ.ա. 19-ից մ.թ. 47 թվականներ, ինչպես նաև 44 ոսկյա համաձուլվածքի մետաղադրամներ, որոնք կոչվում են ստատերամ, և որոնք դրոշմվել են Բրիտանիայում։

Գանձագումարը պարունակում էր նաև 288 արծաթե մետաղադրամ, որոնք բոլորն էլ դրոշմվել են մ.թ.ա. 200 թվականի և մ.թ. 47 թվականի միջակայքում։ Դրանցից մեկին պատկերված է Հուլիոս Կեսարը, կա նաև մետաղադրամի հազվագյուտ օրինակ, որտեղ պատկերված է Նումիդիայի (ժամանակակից Ալժիր) թագավոր Ջուբան:

Հոլանդացի հնագետները կարծում են, որ գանձը հավանաբար թաղվել է մ.թ. 47 թվականին: Բրիտանիայից վերադարձող հռոմեացի զինվորը հավանաբար վերցրել էր հռոմեական մետաղադրամները որպես վարձատրություն, իսկ բրիտանական մետաղադրամները՝ որպես պատերազմական ավար։ Հավանաբար զինվորը ծրագրել է մետաղադրամները ավելի ուշ փորել-հանել, կամ գուցե թաղել է որպես երախտագիտության նշան աստվածներին, որոնք թույլ են տվել նրան ապահով վերադառնալ մարտադաշտից։