Վենեսուելայի ենթադրյալ թմրավաճառների դեմ ԱՄՆ ռազմական գործողությունը, ինչպես նաև Դոնալդ Թրամփի հայտարարած սպառնալիքները նախագահ Նիկոլաս Մադուրոյի դեմ ցամաքային հարձակման մասին, մտահոգել են եվրոպական տերություններին, որոնք ռազմավարական տարածքներ ունեն Կարիբյան ավազանում, գրում է AFP-ն։

Ըստ պաշտոնյաների և աղբյուրների, Ֆրանսիան, Նիդեռլանդները և Մեծ Բրիտանիան այնքան են անհանգստացած, որ սկսել են սահմանափակել հետախուզական տվյալների փոխանակումը Վաշինգտոնի հետ՝ վախենալով, որ դրանք կարող են օգտագործվել հարվածների համար, որոնք իրենց երկրներում կհամարվեն անօրինական։

Մեծ Բրիտանիան պահպանում է մի քանի փոքր տարածքներ Կարիբյան ավազանում՝ դեռևս գաղութային ժամանակներից։ Մարտինիկան և Գվադելուպան, ինչպես նաև Ֆրանսիական Գվիանան Հարավային Ամերիկայի մայրցամաքում այժմ պաշտոնապես Ֆրանսիայի մաս են։ Նիդեռլանդներն ունեն առավել զարգացած աշխարհագրական ներկայություն՝ երեք ABC կղզիներ՝ Արուբա, Բոնայրե և Կյուրասաո, որոնք գտնվում են Վենեսուելայի ափերի մոտ և կազմում են թագավորության մասը։

Վենեսուելան մեղադրել է Վաշինգտոնին՝ Կարակասում ռեժիմը փոխելու փորձի մեջ՝ ռազմական ուժի կուտակման միջոցով, ներառյալ ավիակրի խումբը, ռազմական նավերը և մի քանի «անտեսանելի» ինքնաթիռները։ Վաշինգտոնը մեղադրում է Մադուրոյին «ահաբեկչական» թմրակարտելի ղեկավար լինելու մեջ, ինչը վերջինս հերքում է։

AFP-ի հրապարակած տվյալներով, սեպտեմբերից ամերիկյան զինված ուժերը սպանել են առնվազն 83 մարդու՝ միջազգային ջրերում թմրանյութ տեղափոխելու մեջ մեղադրվող նավերի դեմ իրականացված օդային հարվածների հետևանքով։

Միացյալ Նահանգները չի ներկայացրել մանրամասներ՝ հաստատելու համար, որ Կարիբյան ավազանում և Խաղաղ օվկիանոսի արևելյան հատվածում ավելի քան 20 հարվածների հետևանքով զոհվածները իսկապես թմրավաճառներ էին։ Թրամփը հայտարարել է, որ իր կարծիքով Մադուրոյի օրերը հաշված են և երկուշաբթի օրը չի բացառել ռազմական միջամտության հնարավորությունը՝ հավելելով, որ բաց է բանակցությունների համար ձախ ուժերի առաջնորդի հետ։

«Հոլանդացիները մտահոգված են իրենց ABC կղզիների վիճակով… որոնք Վենեսուելայի ափերից գտնվում են մոտ 50 կմ հեռավորության վրա», – ասել է ֆրանսիացի զինորական պաշտոնյան։

Նա հավելել է, որ պատերազմի դեպքում իրենք «կհայտնվեն ռազմաճակատիառաջնագծում»։