2020 թվականի սկզբից կորոնավիրուսի համավարակի ֆոնին համակարգչային խաղեր օգտագործողների թիվն աշխարհում աճել է գրեթե 50 տոկոսով: Ինչպես հինգշաբթի հայտնել է Yonhap գործակալությունը՝ վկայակոչելով խաղային կոնտենտի մշակման ոլորտում մասնագիտացած Unity Technologies ընկերության զեկույցը, փոխանցում է ՏԱՍՍ-ը:
«Անցած տարվա նույն ժամանակահատվածի համեմատ գեյմերների թիվը 46 տոկոսով ավելացել է»,- նշվում է հաղորդագրության մեջ: Ընդ որում, բջջային խաղերի օգտագործողների թիվն աճել է 17 տոկոսով:
Նշվում է, որ մինչեւ համավարակն այս ցուցանիշը մոտ 13 տոկոս էր կազմում եւ սկսել է կտրուկ աճել մարտին, երբ շատ երկրներում կարանտինային ռեժիմ հայտարարվեց:
«Ավելի ու ավելի շատ մարդիկ են սկսում համակարգչային խաղեր խաղալ, ընդ որում, ամեն օր ավելի շատ ժամանակ են ծախսում դրանց վրա՝ համավարակից առաջ հանգստյան օրերի համեմատ»,- նշվում է զեկույցում: Հաղորդվում է, որ նշված ժամանակահատվածում բջջային հավելվածների ներբեռնման քանակն աճել է ռեկորդային 84 տոկոսով:
