Վանաձորում մի շարք հետիոտնային եւ ավտոմոբիլային կամուրջներ կան, որոնց մեծ մասը գտնվում է վթարային վիճակում: Հետիոտնային կամուրջների թիվը Վանաձորում 28-ն է, իսկ տրանսպորտային կամուրջներինը` 32-ը:

Ուսումնասիրությունների արդյունքում պարզվել է, որ գրեթե բոլոր կամուրջները  վերանորոգման կարիք ունեն, իսկ մի մասը պետք է նորոգվի անհապաղ: Կամուրջների վթարային իրավիճակին նպաստում են նաեւ եղանակային անբարենպաստ պայմաններն ու գետերի վարարումները, որոնք լվանում են հենապատերն ու խարխլում կամուրջի հիմքը: Այս ամենին եթե գումարվի նաեւ կառուցման տարեթիվը, ապա դրանք իսկապես բարոյական  ու ֆիզիկական  մաշվածություն  ունեն:

Անհապաղ նորոգման կարիք ունի 11-ն  կամուրջ,  դրանց թվում առաջին հերթին մեծ հնչեղություն ստացած Չուխաջյան փողոցի հետիոտնային կամուրջն է, որին NEWS.am-ը եւս անդրադարձել է: Աշխատանքներն արդեն սկսվել է, հաշված օրեր անց խնդիրը կլուծվի:

Տրանսպորտային կամուրջներից այս տարի նորոգվելու է Թումանյանի հրապարակը Հալաբյան փողոցին կապող կամուրջը, որի հիմքը ջրի առատ հոսքի հետեւանքով թուլացել է: Վերջինիս համար հատկացվել է 80 մլն դրամ:  Իսկ Դարպաս գյուղի վթարային  կամուրջների մասին բազմիցս է խոսվել, սա եւս այս տարի կնորոգվի` ավագանու որոշմամբ հատկացվել է 30 մլն դրամ:

 

Լուսանկարները` Էդվարդ Արզումանյանի