Նախընտրելի
Ռուսաստանի Դաշնության գլխավոր դատախազությունը հերքել է հայկական մամուլում տարածված տեղեկատվությունը, թե Ռուսաստանում քննվող քրեական գործերով շոշափվում են նաեւ Հայաստանի բարձրաստիճան պաշտոնյաների անունները, թե անգամ կազմվել է նման ցուցակ ու ՌԴ գլխավոր դատախազության կողմից փոխանցվել ՀՀ գլխավոր դատախազին:
«Ռուսաստանի Դաշնության գլխավոր դատախազությունը չի տիրապետում որեւէ տեղեկատվության, թե մամուլում նշված անձինք որեւէ մեղսակցություն ունեն Ռուսաստան Դաշնության տարածքում կատարված որեւէ հանցագործության»,- հայտարարել է ՌԴ գլխավոր դատախազությունը՝ ի դեմս գլխավոր դատախազի տեղակալ Ե.Զաբարչուկի:
Հիշեցնենք, որ Հայաստանի գլխավոր դատախազությունը նախկինում հանդես եկել էր հերքումով՝ հայտարարելով, որ տպագրվածը մտացածին է, արհեստածին:
Ռուսաստանի դատախազությունը ՀՀ գլխավոր դատախազություն է ուղարկել ճիշտ հակառակի մասին վկայող պաշտոնական գրություն՝ ընդգծելով, որ տեղեկություններ չունեն նման քրեական գործերի առկայության մասին: Հետեւապես չէին կարող ինչ-որ ցուցակ կազմել, առավել եւս հանձնել Հայաստանի իրավապահ մարմիններին: Ընդ որում՝ Ռուսաստանի դատախազությունը պաշտոնական գրություն է ուղարկել Հայաստանի դատախազություն՝ հերքելով հայկական մամուլի հրապարակումները:
