նախընտրելի դարձնելԲեռլինում մեկնարկել են Գերմանիա-Հայաստան միջազգային տնտեսական համաժողովի աշխատանքները: ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը փետրվարի 15-ին հանդես է եկել բացման խոսքով:
Ողջունելով համաժողովի մասնակիցներին՝ նախարարն ընդգծել է, որ վերջին տարիներին ՏՀՏ ոլորտն արագ զարգացել է Հայաստանում:
«Այդ հանգամանքը թույլ է տվել Հայաստան ներգրավել միջազգային կազմակերպություններ ու օտարերկրյա ներդրումներ` կառուցելու մրցունակ աշխատաշուկա, ապրանքներ ու ծառայություններ մատուցել ամբողջ աշխարհում»,- նշել է նախարարը:
Վահան Մարտիրոսյանը ներկայացրել է նաեւ Հայաստանում գործող ՏՀՏ ընկերությունների առաջարկած արտադրանքի եւ ծառայությունների ուղղությունները. ծրագրերի մշակում, ինժեներություն, չիպ - դիզայն, արհեստական ինտելեկտ, ցանցային համակարգեր եւ այլն:
Ենթակառուցվածքների զարգացման տեսանկյունից նախարարը կարեւորել է «Հյուսիս-հարավ ճանապարհային միջանցք» ներդրումային ծրագիրը, որի նպատակն է կապել երկրի հյուսիսը հարավին` բարելավելով ինչպես տարածաշրջանային, այնպես էլ Եվրոպա-Կովկաս-Ասիա ճանապարհային հաղորդակցությունը:
«Նախագիծը բաց է պետություն-մասնավոր հատված համագործակցության ձեւաչափով իրականացնելու համար, մենք կողջունենք նաեւ գերմանական ընկերությունների ներգրավվածությունը»,-նշել է Վահան Մարտիրոսյանը:
Նա հույս է հայտնել, որ Գերմանիա-Հայաստան միջազգային տնտեսական համաժողովը հնարավորություն կտա երկու երկրների ազգային ընկերություններին սերտացնել եւ խորացնել համագործակցության շրջանակները:
Հաջորդիվ տեղի են ունեցել տեղեկատվական տեխնոլոգիաների, հեռահաղորդակցության, տրանսպորտի եւ ճանապարհաշինության ոլորտներին առնչվող քննարկումներ, որտեղ ներկայացվել են իրականացվող ծրագրերն ու զարգացման հեռանկարները:
Համաժողովին մասնակցում են շուրջ 15 մասնավոր հայկական ընկերություններ, որոնք հետաքրքրված են նոր գործարար կապերի հաստատմամբ եւ ծրագրերի իրականացմամբ:
