նախընտրելի դարձնել
Հանրային ծառայությունները կարգավորող հանձնաժողովը գազի սակագնի հաշվարկման նոր մեթոդաբանություն է մշակել, որը կօգնի խուսափել դրա թանկացումից: Այս մասին նոյեմբերի 3-ին Հայաստանի Ազգային ժողովում ֆինանսավարկային եւ բյուջետային հարցերի, ինչպես նաեւ տնտեսական հարցերի մշտական խորհրդարանական հանձնաժողովների համատեղ նիստին 2021 թվականի բյուջեի նախագծի քննարկման ժամանակ ասաց ՀՀ Հանրային ծառայությունները կարգավորող հանձնաժողովի նախագահ Գարեգին Բաղրամյանը:
Նա, մասնավորապես, նշեց, որ մեթոդաբանությունն առաջարկում է միջինացնել «Գազպրոմ Արմենիա» ընկերության եկամուտներն ու ծախսերն առաջիկա 10 տարվա ընթացքում, որպեսզի այդ տարիների ընթացքում սակագինը չտատանվի կամ տատանվի նվազագույն կերպով:
«Այս տարիների ընթացքում ընկերությունը 200-230 միլիարդ դրամի ներդրումներ է նախանշել: Ներդրումների միջոցով ընկերությունը կբարելավի իր բաշխիչ ցանցի սարքինությունն ու արդյունավետությունը: Որքան շուտ այն սկսի դա անել, այնքան շուտ կսկսի լրացուցիչ շահույթ ստանալ»,- պարզաբանեց Բաղրամյանը:
Նույն մոտեցումը, ինչպես նշեց գերատեսչության ղեկավարը, ժամանակին կիրառվել է նաեւ «Հայաստանի էլեկտրական ցանցերի» նկատմամբ:
Այսօր գործող տեխնիկական կանոնակարգերն ավելի շատ աշխատողներ են պահանջում ցանցի համար, քան, «Գազպրոմ Արմենիայի» գնահատմամբ, իրականում պահանջվում է: Պաշտոնապես պետք է աշխատի մոտ յոթ հազար մարդ, բայց իրականում աշխատում է 5800-ը: Անցած տարիների ընթացքում ընկերությունն այնտեղ մարդկանց է կրճատել, որտեղ ցանցի անվտանգությանն ուղղակի սպառնալիք չի եղել: Այժմ անհրաժեշտ կլինի եւս հազար մարդ կրճատել, եւ, ամենայն հավանականությամբ, դա կլինի տեսուչների մի մասը, որոնք ստուգում են հաշվիչ սարքերի ցուցիչները:
