նախընտրելի դարձնել
Ճապոնիան համաձայնել է ավելի շատ հեղուկ բնական գազ գնել ԱՄՆ-ից եւ Օմանից, որպեսզի ապահովի վառելիքի մատակարարումները եւ խուսափի ապագայում դեֆիցիտից, գրել է Bloomberg-ը:
Ճապոնական խոշորագույն հետախուզական Inpex Corp. ընկերությունը պայմանագիր է ստորագրել Լուիզիանայում 20 տարվա ընթացքում Venture Global LNG CP2 արտահանման նախագծի շրջանակներում տարեկան 1 մլն տոննա գազ գնելու մասին։ Venture Global-ի տվյալներով՝ CP2-ի շինարարությունը նախատեսվում է սկսել հաջորդ տարի:
Ճապոնական մի քանի ընկերություններ, այդ թվում՝ Mitsui & Co.-ն, Itochu Corp.-ն եւ երկրի խոշորագույն էլեկտրաէներգիա արտադրող Jera Co.-ն համաձայնագիր կկնքեն Օմանի հետ՝ 2025 թվականից 10 տարով տարեկան լրացուցիչ 2 միլիոն տոննա կամ ավելի գնելու մասին, հայտնում է NHK-ն:
Ճապոնիայի կառավարությունն ուսումնասիրում է էներգետիկ անվտանգության բարելավման հնարավորությունը՝ երկրում վառելիքի պակասի պայմաններում: Կանխատեսվում է, որ ՀԲԳ-ի գլոբալ մատակարարումները երկար տարիներ սահմանափակ կմնան, ինչը սպառնում է ներմուծման արժեքի աճով եւ ինֆլյացիայի աճով:
Սա նաեւ տեղաշարժ է նշանակում ՀԲԳ-ի ճապոնական ներկրողների համար, որոնք հրաժարվել են երկարաժամկետ գործարքներից՝ ակնկալելով, որ էներգիայի ավելի մաքուր աղբյուրներին անցումը կնվազեցնի այս տասնամյակում գազի պահանջարկը: Փոխարենը, ընկերությունները մեծացրել են իրենց կախվածությունը կարճաժամկետ սփոթ շուկայից՝ ՀԲԳ-ի մատակարարումներն ապահովելու համար:
Սակայն սփոթ շուկայի կոշտ լինելու եւ ռեկորդային բարձր մակարդակին մոտ գների պատճառով ճապոնական ընկերություններն այժմ փոխում են ընթացքը եւ տարիների համար ֆիքսում են մատակարարումները ավելի գրավիչ դրույքներով:
