Ուկրաինայի հետ հազվագյուտ հողերի վերաբերյալ ցանկացած համաձայնագիր պետք է համապատասխանի եվրոպական օրենսդրությանը, հայտարարել է այցով Կիև ժամանած Գերմանիայի արտգործնախարար Անալենա Բերբոքը, հաղորդում է Sky News-ը։

Ըստ նրա՝ Եվրոպան արդեն պայմանավորվել է Ուկրաինայի հետ, որ ցանկացած նոր համաձայնագիր պետք է համապատասխանի Եվրամիության օրենսդրությանը։

«Ի վերջո, սա մեր եվրոպական մայրցամաքն է»,-ասել է նա:

Միացյալ Նահանգները վերջերս Ուկրաինային է ներկայացրել հանքանյութերի մասին համաձայնագրի նոր տարբերակը՝ քննարկման համար։

Ինչպես հաղորդում է РБК-Украина-ն, սա արդեն լիարժեք գործարք է, այլ ոչ թե շրջանակային համաձայնագիր, որը նախատեսվում էր կնքել ավելի վաղ։

Ուկրաինայի նախագահ Վլադիմիր Զելենսկին նշել է, որ փաստաթուղթը դեռ պետք է ուսումնասիրեն իրավաբանները։ Այն պարունակում է որոշ մանրամասներ, որոնք նախկինում երկու կողմերն էլ մերժել էին։

Զելենսկին միաժամանակ ընդգծել է, որ Ուկրաինան չի ստորագրի համաձայնագիրը, եթե այն Ուկրաինայի համար ԱՄՆ-ի առջև որևէ պարտավարություն նախատեսի։

Ըստ Ուկրաինայի նախագահի՝ գործարքը չի ստորագրվի նույնիսկ այն դեպքում, եթե այն սպառնա Ուկրաինայի անդամակցությանը ԵՄ-ին։