նախընտրելի դարձնել
Բանգլադեշի ժամանակավոր կառավարությունն արգելել է երկրի նախկին վարչապետ Շեյխ Հասինայի կուսակցության ողջ գործունեությունը, որը տապալվել էր անցյալ տարի ուսանողական ապստամբությունից հետո, հայտնում է Al Jazeera-ն։
Նոբելյան մրցանակի դափնեկիր Մուհամմադ Յունուսի գլխավորած ժամանակավոր նախարարների կաբինետը որոշում է կայացրել արգելել «Ժողովրդական լիգան»՝ «Ահաբեկչության դեմ պայքարի մասին» օրենքի համաձայն, շաբաթ ուշ երեկոյան հայտնել է Բանգլադեշի իրավական հարցերով խորհրդական Ասիֆ Նազրուլը։
Արգելքը կգործի այնքան ժամանակ, քանի դեռ չի ավարտվել կուսակցության և նրա ղեկավարության դատավարությունը՝ Միջազգային քրեական տրիբունալի (ՄՔՏ) մոտ հարյուրավոր ցուցարարների սպանության կապակցությամբ, ասվում է կառավարության հայտարարության մեջ։
«Ժողովրդական լիգայի» ուսանողական թևը՝ «Բանգլադեշ Չհատրա լիգան», արգելվել էր հոկտեմբերին այն բանից հետո, երբ այն «ահաբեկչական կազմակերպություն» էր անվանվել ապստամբության ժամանակ ցուցարարների վրա դաժան հարձակումներին մասնակցելու համար։
Հազարավոր ցուցարարներ, այդ թվում՝ նորաստեղծ ուսանողական կուսակցության կողմնակիցները, մի քանի օր շարունակ դուրս էին եկել Դաքքայի փողոցներ՝ «Ժողովրդական լիգան» արգելելու պահանջով։ «Ջամաաթ-ի-Իսլամի» կուսակցության ուսանողական թևի անդամները նույնպես նկատելի մասնակցություն են ունեցել բողոքի ակցիաներին։
