Թուրքիայի մայրաքաղաքում հոկտեմբերի 10-ին տեղի ունեցած հզոր պայթյունների հետեւանքով վիրավորված՝ ստամբուլահայ Ռուդի Սայաթ Փուլաթյանը համոզված է, որ կառավարությունը կարող էր կանխել պայթյունը:
NEWS.am-ի թղթակցի հետ զրույցում Ռուդի Փուլաթյանը, որը բուժում է ստանում Ստամբուլի հիվանդանոցներից մեկում, նշեց, որ իր կարծիքով՝ կատարվածը դժբախտ դեպք չէր:
«Պայթյունի վայրը շատ մոտ էր Ազգային հետախուզության ծառայության, Էրդողանի նստավայրին եւ ոստիկանության գլխավոր մասնաշենքին: Այնպես որ անհնար է ուշադրություն չդարձնել այս փաստի վրա: Երբ ես եկա հանրահավաքի հրապարակ, ես շարժվեցի դեպի այն վայրը, որտեղ կանգնած էին քրդական «Ժողովուրդների դեմոկրատական» կուսակցության անդամները»,- ասաց նա:
Ռուդին պատմեց, որ երբ պայթյունը որոտաց, ինքը 20 մետր հեռու էր հրապարակից: Սկզբում, նա չի հասկացել, որ ոտքը վնասվել է. «Սակայն ես բախտավոր մարդ եմ, որովհետեւ «Շտապօգնության» մեքենան կողքիս էր, ես կարողացա արագ նստել, որովհետեւ դրանից անմիջապես հետո ոստիկանությունը եկավ եւ սկսեց արցունքաբեր գազով ցրել ցուցարարներին»:
Նշենք, որ Անկարայի Մերձավոր Արեւելքի տեխնիկական համալսարանի ուսանող Ռուդի Սայաթ Փուլաթյանը 2014թ.-ից քրդական «Ժողովուրդների դեմոկրատական» կուսակցության անդամ է: Նրա ծնողները Թուրքիա են գաղթել Սեբաստիայից 1915թ.-ին:
Հիշեցնենք, որ Թուրքիայի մայրաքաղաք Անկարայում 2015թ. հոկտեմբերի 10-ի առավոտյան արհմիությունների կազմակերպած Խաղաղության հանրահավաքի ժամանակ տեղի են ունեցել հզոր պայթյուններ, որոնց հետեւանքով զոհվել է առնվազն 97, վիրավորվել 246 քաղաքացի: