Monsanto ընկերությունը վստահեցնում է, որ ԳՄՕ սերմեր չի ներմուծում եւ մաքսատներում էլ ԳՄՕ սերմեր չեն հայտնաբերվել: Այս մասին այսօր՝ դեկտեմբերի 12-ին, լրագրողների հետ հանդիպմանն ասաց Հայաստանի գյուղատնտեսության նախարար Իգնատի Առաքելյանը՝ պատասխանելով NEWS.am-ի հարցին, թե նախարարությունը ճշտել է տարածված տեղեկությունները, թե այդ ամերիկյան ընկերությունը ԳՄՕ սերմեր է ներմուծում եւ արդյոք վտանգ կա, որ Հայաստան նման սննդամթերք կարող է ներմուծվել:
«Քանի համապատասխան օրենսդրություն չկա, վտանգ միշտ էլ կարող է լինել, որ հնարավոր է՝ ներմուծվեն: Այդ պատճառով հատուկ աշխատանքային հանձնաժողով ենք ստեղծել, որի կազմում կան համապատասխան գերատեսչությունների, հասարակական կազմակերպությունների ներկայացուցիչներ: Մենք կներկայացնենք համապատասխան միջոցառումների ցանկ եւ թե ինչ օրենսդրական նախաձեռնություններ են պետք»,- ասաց գյուղատնտեսության նախարարը:
Նշենք, որ ԳՄՕ սննդամթերքների հետ կապված օրենսդրական նախաձեռնություն 2013թ.-ին եղել է, սակայն այն շարունակություն չի ունեցել:
Հիշեցնենք, որ շուրջ մեկ ամիս առաջ Հայաստանում ԱՄՆ դեսպանատան գործերի ժամանակավոր հավատարմատար Ռաֆիկ Մանսուրը նշել է, որ Հայաստանի շուկա է մտնում «Monsanto» ընկերությունը, որը զբաղվում է ԳՄՕ սերմերի արտադրությամբ: Արդեն իսկ մտահոգություններ են հնչում, որ դա կարող է վտանգավոր լինել Հայաստանի բնակչության համար: Հայտնի երաժիշտ Սերժ Թանկյանը եւս կոչ է արել մարդկանց հեռու մնալ «Monsanto»-ի արտադրանքից:
ԱՄՆ դեսպանատունն այս խնդրի առնչությամբ NEWS.am-ի հարցմանն ի պատասխան հայտարարել է, որ «Մոնսանտո» ընկերության արտադրանքից եւ ծառայություններից օգտվել չօգտվելու որոշումը կայացվելու է ֆերմերների եւ ագրոբիզնեսների կողմից: