Կայացել է ՀՀ վճռաբեկ դատարանի նախագահ Արման Մկրտումյանի, քրեական պալատի նախագահ Դավիթ Ավետիսյանի, քաղաքացիական եւ վարչական պալատի նախագահ Երվանդ Խունդկարյանի եւ ՀՀ փաստաբանների պալատի նախագահ Արա Զոհրաբյանի համատեղ քննարկումը՝ արդարադատության ոլորտի հիմնախնդիրների վերաբերյալ։

Դատական դեպարտամենտի եւ փաստաբանական պալատի մամուլի ծառայությունները հայտնում են, թե քննարկման արդյունքում կողմերը,

կարեւորելով բարձրագույն դատական ատյանի՝ ՀՀ վճռաբեկ դատարանի առանձնահատուկ դերը արդարադատության ոլորտում,

նպատակ ունենալով առավելագույնս ապահովել արդար, մատչելի եւ արդյունավետ դատաքննության իրավունքը, նկատի ունենալով արդարադատության ոլորտի հիմնախնդիրների վերաբերյալ կառուցողական քննարկումների կարեւորությունը, որոշեցին՝

ստեղծել համատեղ աշխատանքային խումբ եւ խմբի առջեւ դնել մասնավորապես հետեւյալ խնդիրը. ՀՀ վճռաբեկ դատարանի կողմից բողոքները վարույթ ընդունելու օրենքով սահմանված հայեցողական լիազորությունը վերացնելու համար ինչ օրենսդրական փոփոխություններ են անհրաժեշտ՝ հաշվի առնելով ՀՀ վճռաբեկ դատարանում առկա դատավորների եւ բողոքարկվող գործերի քանակը։

Աշխատանքային խմբի կազմը կորոշվի եւ կհրապարակվի լրացուցիչ։