նախընտրելի դարձնելԹուրքիայի արտգործնախարար Ահմեդ Դավութօղլուն Բրյուսելում գաղտնի հանդիպել է Իսրայելի առեւտրի եւ արդյունաբերության նախարար Բեն Էլիզերի հետ։
Թուրքական Radikal-ի փոխանցմամբ՝ Բրյուսելում Թուրքիայի՝ ԵՄ-ին անդամակցության համար նոր բանակցությունների խորհրդաժողովից հետո տեղի է ունեցել գաղտնի հանդիպումը։ 2,5 ժամանոց այդ հանդիպումը տեղի է ունեցել Բրյուսելի Crown plaza հյուրանոցում, որին թուրքական կողմից մասնակցել է նաեւ ԱԳՆ գլխավոր խորհրդական Ֆերիդուն Սինիրլիօղլուն, ԵՄ-ում Թուրքիայի մշտական ներկայացուցիչը եւ 1 անվտանգության աշխատակից։ Հանդիպմանը որոշվել է կրկին կարգավորել երկկողմ հարաբերությունները, սակայն կողմերը նախ պետք է տեղեկություններ հաղորդեն իրենց նախագահներին, եւ այնուհետ շարունակեն քննարկումները։
Հայտնի է դարձել, որ Դավութօղլուի հետ հանդիպմանը հրաժարվել է մասնակցել Իսրայելի ԱԳ նախարար Ավիգդոր Լիբերմանը, այդ պատճառով հանդիպմանը մասնակցել է առեւտրի եւ արդյունաբերության նախարար Բեն Էլիզերը։
Հիշյալ հանդիպման մասին լուրը հաստատել է նաեւ Իսրայելի կառավարության մի պաշտոնյա՝ նշելով, որ հանդիպումը եղել է կիսապաշտոնական։
Նշենք, որ մայիսի 31-ին Գազա ուղեւորվող թուրքական Mavi Marmara նավի դեմ Իսրայելի իրականացրած գործողություններից հետո խիստ լարվել են թուրք-իսրայելական հարաբերությունները: Թուրքիան Իսրայելից պահանջում է ներողություն խնդրել, փոխհատուցում տալ սպանվածների ընտանիքներին եւ միջազգային հետաքննող հանձնաժողով ստեղծել։
