«Հայաստանի փոքր եւ միջին ձեռնարկատիրության զարգացման ազգային կենտրոն» (ՓՄՁ ԶԱԿ) հիմնադրամում 2016թ.-ին մեկնարկել է 2 նոր միջազգային ծրագիր, ընդլայնվել է միջազգային համագործակցությունը: Այս մասին, փետրվարի 9-ին, լրագրողների հետ հանդիպման ժամանակ նշել է Հայաստանի ՓՄՁ զարգացման ազգային կենտրոն հիմնադրամի գործադիր տնօրեն Լեւոն Մնացականյանը:

Ըստ Մնացականյանի` ՓՄՁ պետական աջակցության 2016թ. ծրագրի շրջանակում ՀՀ 2016թ. պետական բյուջեից հատկացվել է 143 մլն ՀՀ դրամ: Բոլոր իրականացվող ծրագրերում ակտիվ ներգրավվածություն են ունեցել Հայաստանի ՓՄՁ ԶԱԿ-ի գործընկեր միջազգային կազմակերպությունները:

«Հայաստանի ՓՄՁ ԶԱԿ-ը վարկային երաշխավորությունների տրամադրման, սկսնակ գործարարների ձեռներեցության, ոլորտային աջակցության, գործարար տեղեկատվական, խորհրդատվական եւ ուսուցողական աջակցության, տեղական տնտեսական զարգացման ուղղություններով մոտ 4300 ձեռնարկության տրամադրել է շուրջ 8900 աջակցություն: Աջակցության 96%-ի հասցեատերերը մարզերի գործող եւ սկսնակ ՓՄՁ-ներն են»,-նշեց Մնացականյանը:

Հայաստանի ՓՄՁ ԶԱԿ-ի վարկային երաշխավորությունների ծրագրով ֆինանսական աջակցություն է ստացել 18 գործող եւ սկսնակ ՓՄՁ:

ՀՀ բոլոր մարզերում իրականացված «Սկսնակ գործարարների ձեռներեցությանն աջակցության» 10 ծրագրի շրջանակներում իրականացված գործարարությամբ զբաղվելու անվճար դասընթացներին եւ խորհրդատվություններին մասնակցել է 152 սկսնակ գործարար: Ստեղծվել է 22 նոր ձեռնարկություն:

Տեղական տնտեսական զարգացման ծրագրի շրջանակներում 5 համայնքային փնջերում (կլաստերներ) վերլուծվել են 19 գյուղական համայնքների մրցակցային առավելությունները եւ բացահայտվել է 82 համայնքային տնտեսական զարգացման նախաձեռնություն, որոնք իրականացել են «Սկսնակ գործարարների ձեռներեցությանն աջակցության» ծրագրի շրջանակում: Բացի այդ, ԱՄՆ ՄԶԳ ֆինանսավորմամբ իրականացվող «Գործընկերություն` հանուն գյուղական համայնքների բարգավաճման» ծրագրի «Փոքր ենթակառուցվածքների զարգացում» բաղադրիչի շրջանակում 2016թ. ընթացքում ավարտվել են 8 ենթակառուցվածքային ծրագրեր, ինչի շնորհիվ հիմնվել են նոր այգիներ, ոռոգելի են դարձել  անջրդի հողեր: Կոտայքի մարզի Բջնի համայնքում կառուցվել է ոռոգման նոր խողովակաշար, Տավուշի մարզի Զորական համայնքում ստեղծվել է ոռոգման համակարգ, Լոռու մարզի Կուրթան համայնքում կառուցվել է հացահատիկի զտման կայան, Տավուշի մարզի Ենոքավան համայնքում ավարտվել է տուրիզմի զարգացման ինֆորմացիոն կենտրոնի շինարարությունը: Սոխի, արեւածաղկի եւ եգիպտացորենի ցանքն արդյունավետ կազմակերպելու նպատակով ճշգրիտ ցանքի սերմնացան է տրամադրվել Զորական եւ Բագրատաշեն համայնքներին: Արագածոտնի մարզի Արագածավան համայնքում հիմնվել է Գյուղատնտեսական եւ անասնաբուժական սպասարկման կենտրոն:  11 սկսնակ ՓՄՁ-ների չրանոցների, ջերմոցների եւ սառնարանային տնտեսությունների հիմնման նպատակով տրամադրվել են դրամաշնորհներ` սարքավորումների եւ նյութերի տեսքով: «Գյուղատնտեսության զարգացման նպատակով իրականացվող գյուղ. տեխնիկայի ներկրման եւ տրամադրման ծրագրի շրջանակում, 2016թ.-ին Հայաստանի ՓՄՁ ԶԱԿ-ը ներմուծել եւ պատվիրատու համայնքներին տրամադրվել է 5 միավոր գյուղտեխնիկա»,-շեշտեց Հայաստանի ՓՄՁ ԶԱԿ-ի գործադիր տնօրենը:

«Անցնող տարում ընդլայնվել է համագործակցությունը միջազգային  կազմակերպությունների հետ համատեղ ծրագրերի մշակման եւ իրականացման ուղղությամբ: Շարունակվել է ԱՄՆ ՄԶԳ ֆինանսավորմամբ «Գործընկերություն հանուն գյուղական համայնքների բարգավաճման» ծրագրի իրականացումը, սկսվել է «Տեղական արտադրության զարգացում եւ տեղական ապրանքանիշերի առաջմղում» Հայաստանի ՓՄՁ ԶԱԿ-ի եւ Ճապոնիայի միջազգային համագործակցության գործակալության համատեղ ծրագրի 2-րդ փուլը, «Ձեռնարկատիրական աշխատանք Հայաստանի երիտասարդության համար» Հայաստանի ՓՄՁ ԶԱԿ-ի եւ ՄԱԿ-ի արդյունաբերության զարգացման կազմակերպության համատեղ ծրագիրը»,- տեղեկացրեց Լեւոն Մնացականյանը: Նա նշեց, որ Ռուսաստանի, Բելառուսի ՓՄՁ ոլորտի աջակցության կազմակերպությունների հետ ստորագրված գործակցության հուշագրերի շնորհիվ շուտով ԵԱՏՄ անդամ այդ երկրների եւ Հայաստանի միջեւ տեղի կունենա  ՓՄՁ աջակցության լավագույն փորձի փոխանակում: Հատկապես կարեւոր է ՌԴ-ում մեկնարկած «Բիզնես նավիգատոր» ծրագրի տեղայնացումը:

Տարեվերջին ՓՄՁ ԶԱԿ-ի գործադիր տնօրեն Լեւոն Մնացականյանը ստորագրեց ԵՄ կողմից 1 միլիոն 123 հազար եվրո դրամաշնորհի պայմանագիրը: Պայմանագիրը ստորագրեցին նաեւ Հայաստանի  տարածքային կառավարման եւ զարգացման նախարար Դավիթ Լոքյանը եւ Հայաստանում  ԵՄ պատվիրակության ղեկավար, դեսպան Պյոտր Սվիտալսկին: Պետական համաֆինանսավորմամբ  ծրագիրն իրականացվելու է Լոռու, Սյունիքի եւ Արմավիրի մարզերում:  Մեկնարկած ծրագրի նպատակն է այդ մարզերում խթանել ձեռնարկատիրությունը, զբաղվածությունը եւ զարգացնել ենթակառուցվածքները:

2016թ. հունիսի 29-ին Երեւանի Ռեդիսոն Բլու հյուրանոցում կայացել է ՀՀ վարչապետի «Լավագույն կին գործարար» 2016թ. մրցանակաբաշխությունը: Վարչապետի անունից Երեւանի եւ մարզերի 12 կին գործարարի մրցանակներ է հանձնել ՀՀ փոխվարչապետը: 2012թ.-ից անցկացվող մրցանակաբաշխության ընթացքում առաջին անգամ Հայաստանի ՓՄՁ ԶԱԿ-ի տնօրենը հանձնել է հատուկ մրցանակ` Արցախից ընտրված 2 կին գործարարի: Մրցանակներ են հանձնել նաեւ Հայաստանի ՓՄՁ ԶԱԿ-ի գործընկեր կազմակերպությունները:

2015 թ. հոկտեմբերից մեկնարկած «ՓՄՁ սուբյեկտների կողմից նոր սերնդի ՀԴՄ-ների ձեռքբերման արժեքի փոխհատուցման ծրագրի» շրջանակում 2016թ. ընթացքում սուբսիդավորվել է 472 ՓՄՁ-ների ՀԴՄ-ի արժեքը:

Հայաստանի ՓՄՁ ԶԱԿ-ը, Համաշխարհային բանկի խումբ հանդիսացող Միջազգային ֆինանսական կորպորացիայի եւ ՀՀ էկոնոմիկայի նախարարության Տեսչական բարեփոխումների խմբի հետ համատեղ, 2016թ. ընթացքում 438 ՓՄՁ-ի համար մարզերում անցկացրել է 10 իրազեկում-խորհրդատվություն` հարկային օրենսդրությանն առնչվող հարցերի եւ տեսչական ստուգումների վերաբերյալ:

«2017 թվականի ընթացքում Հայաստանի ՓՄՁ ԶԱԿ-ի կողմից իրականացվող պետական աջակցության ծրագրերը շարունակաբար կընդլայնվեն եւ կհամալրվեն աջակցության նոր գործիքներով՝ հիմք ընդունելով ՀՀ կառավարության կողմից նախանշված տնտեսական զարգացման առաջնահերթությունները»- եզրափակեց հիմնադրամի գործադիր տնօրեն Լեւոն Մնացականյանը: