նախընտրելի դարձնելԱպրիլի 5-ին արտաքին գործերի նախարար Էդվարդ Նալբանդյանը մասնակցեց ընդունելության` նվիրված Հայաստանի եւ Չինաստանի միջեւ դիվանագիտական հարաբերությունների հաստատման 25-րդ տարեդարձին: Միջոցառմանը ներկա էին Սահմանադրական դատարանի նախագահ Գագիկ Հարությունյանը, կառավարության անդամներ, ԱԺ պատգամավորներ, Հայաստանում հավատարմագրված դիվանագիտական առաքելությունների ղեկավարներ:
Միջոցառմանը տեղի ունեցավ նաեւ դիվանագիտական հարաբերությունների հաստատման 25-ամյակին նվիրված հոբելյանական փոստային ծրարների մարում:
Ներկաներին ողջույնի խոսքով դիմեցին Հայաստանի արտաքին գործերի նախարար Էդվարդ Նալբանդյանը եւ Հայաստանում Չինաստանի դեսպան Թիան Էրլունը:
Հարաբերությունների 25-ամյա հոբելյանին նվիրված իր ելույթում նախարար Նալբանդյանը, մասնավորապես, նշեց.
«Շնորհավորում եմ Հայաստանի եւ Չինաստանի միջեւ դիվանագիտական հարաբերությունների հաստատման 25-ամյա հոբելյանի կապակցությամբ: Այս նշանակալի իրադարձությունը նշվում է մի շարք հանդիսավոր միջոցառումներով, որոնք ինչպես այսօր, այնպես էլ ամբողջ տարվա ընթացքում կազմակերպվելու են մեր երկու երկրներում` արտացոլելով հայ-չինական քառորդդարյա ամուր բարեկամական հարաբերությունների բարձր մակարդակը:
Անշուշտ, մեր երկու ժողովուրդների միջեւ կապերը շատ ավելի հին են եւ անցած քառորդ դարը ընդամենը մի ակնթարթ է մեր փոխադարձ բազմաբնույթ առնչությունների հազարամյա պատմության մեջ: Հայ ժողովուրդը դեռեւս հնուց ակնածանքով է վերաբերվել, ինչպես մեր պատմահայր Խորենացին է ավանդել` Չինաստանի խաղաղասեր ու կենսասեր ժողովրդին եւ քաղաքակրթությանը:
Ահա այսպիսի կուռ հիմքերի վրա են խարսխված մեր միջպետական հարաբերությունները, որոնց մեկնարկը տրվեց 1992 թվականի ապրիլի 6-ին: Ինչպես ասում է չինական ասացվածքը` հազար կիլոմետրանոց ճանապարհը սկսվում է առաջին քայլից: Հետադարձ հայացք նետելով Հայաստանի Հանրապետության եւ Չինաստանի Ժողովրդական Հանրապետության միջեւ կապերին կարող ենք գոհունակությամբ արձանագրել, որ մենք հաստատակամորեն առաջ ենք ընթանում համագործակցության այս ճանապարհով` այն շարունակաբար հարստացնելով արժանահիշատակ բազում իրադարձություններով:
Հաջողությամբ է ծավալվում բարձր մակարդակի քաղաքական երկխոսությունը, սերտ փոխգործակցություն է ձեւավորվել միջազգային հարթակներում, ստեղծվել է լայն իրավապայմանագրային դաշտ, աճում է տնտեսական համագործակցությունը, զարգանում են միջխորհրդարանական, ապակենտրոնացված, մշակութային, գիտակրթական կապերը:
Անշուշտ, այս բոլոր ձեռքբերումների հիմքում ընկած են Հայաստանի եւ Չինաստանի ղեկավարների պայմանավորվածություններն` ուղղված մեր բազմաբովանդակ ու բազմաշերտ համագործակցության ընդլայնմանն ու խորացմանը, եւ նրանց կողմից նախանշված ուղղություններով գործադրվող շարունակական ջանքերն ու համատեղ արդյունավետ աշխատանքը: Այս առումով ես կցանկանայի հատկապես ընդգծել 2015թ. մարտին ՀՀ Նախագահ Սերժ Սարգսյանի՝ Չինաստան կայացած պետական այցը եւ Նախագահ Սի Ծինպինի հետ հանդիպումը:
Տիկնայք եւ պարոնայք,
Հայ-չինական բարեկամության հարատեւությունն ապացույցների կարիք չունի: Այսօր, ամփոփելով անցած քառորդդարյա նշանակալի ճանապարհը, մենք նոր էջ ենք բացում միջպետական հարաբերությունների մատյանում, որտեղ, վստահ եմ, համատեղ ջանքերով գրանցելու ենք նորանոր ձեռքբերումներ ու նվաճումներ՝ ի շահ մեր երկրների ու ժողովուրդների դարավոր բարեկամության:
Շնորհակալություն»:
