Մարոկկոյի կապերը Եվրամիության հետ պետք է պաշտպանված լինեն Եվրախորհրդարանում ճնշումներից։ Այս մասին հայտարարել է արտգործնախարար Նասեր Բուրիտան՝ եվրոպական օրենսդիրների, Կատարի եւ Մարոկկոյի հետ կապված կոռուպցիոն մեղադրանքների հետաքննությունից հետո, հաղորդում է Reuters-ը:

«Այս գործընկերությունը բախվում է մշտական հետապնդումների եւ ԶԼՄ-ներում կրկնվող հարձակումների»,-ասել է նա։

Բելգիայի իշխանությունները Եվրոպական խորհրդարանի հետ կապ ունեցող չորս անձի մեղադրանք են առաջադրել այն պնդումների կապակցությամբ, որ Կատարը նրանց նվերներ եւ գումար է տվել՝ որոշումների կայացման վրա ազդելու համար։ Կատարը հայտարարել է այդ սկանդալին իր մասնակցության մասին։

Մարոկկոն հրապարակավ չի մեկնաբանում այս գործը:

«ԵՄ-ի հետ Մարոկկոյի գործընկերությունը հիմնված է բարիդրացիության, արժեքների եւ փոխադարձ շահերի վրա»,-ասել է Բուրիտան:

Կոռուպցիայի մեղադրանքները լուրջ են, իր հերթին հայտարարել է ԵՄ դիվանագիտության ղեկավար Ժոզեպ Բորելը Բուրիտայի եւ նույն օրը ավելի վաղ վարչապետ Ազիզ Ահնուշի հետ այդ հարցը քննարկելուց հետո:

«Եվրամիությունը կոռուպցիայի նկատմամբ զրոյական հանդուրժողականության դիրքորոշում ունի եւ կսպասի այդ գործով դատական քննության որոշման արդյունքներին»,-հավելել է նա։

Բորելի խոսքով՝ ԵՄ օգնությունը Մարոկկոյին 2021-2027 թվականներին կհասնի 1,6 միլիարդ եվրոյի՝ 2014-2020 թվականների 1,4 միլիարդից: