Վարչական դատարանը պարտավորեցրել է Ազգային անվտանգության ծառայությանը հանել Մուրադ Փափազյանի և Մասիս Աբրահամյանի անունները անցանկալի անձանց ցուցակներից: Այս մասին այսօր՝ հունվարի 25-ին, մամուլի ասուլիսի ժամանակ հայտնեց փաստաբան Ռուբեն Մելիքյանը:
Խոսելով վարչական դատարանի կայացրած որոշման հնարավոր հետևանքների մասին, Ռուբեն Մելիքյանը ասաց. «Ակնկալվում է, որ Ազգային անվտանգության ծառայությունը բավարարված չի լինի և Վերաքննիչ դատարան կդիմի, սակայն մի փոքր հույս ունեմ, որ խնդրին խորապես ծանոթանալով՝ Ազգային անվտանգությունը կփորձի լուծումներ գտնել այս իրավիճակների համար»:
Հիշեցնենք, որ 2022 թվականի հուլիսի 13-ին  Ֆրանսիայի հայկական կազմակերպությունների համակարգող խորհրդի (CCAF) համանախագահ, ՀՅԴ Բյուրոյի անդամ Մուրադ Փափազյանի մուտքը ՀՀ արգելվել է. նա  անցանկալի անձ է ճանաչվել Հայաստանում: Կառավարության պարզաբանմամբ Մուրադ Փափազյանի մուտքը Հայաստան արգելվել է այն պատճառով, որ վերջինս հանդիսացել է 2021 թվականի հունիսի 1-ին Ֆրանսիայում ՀՀ դեսպանության մոտ վարչապետի գլխավորած կառավարական պատվիրակության՝ ՀՀ պետական դրոշակիր ավտոշարասյան դեմ հարձակում կազմակերպած անձանցից մեկը:
2022 թվականի օգոստոսի 1-ին արգելվել է Հոլանդիայի Հայ Դատի ատենապետ, կուսակցական գործիչ Մասիս Աբրահամյանի մուտքը Հայաստան: Վերջինիս համոզմամբ, իրեն անցանկալի անձ ճանաչելը պայմանավորված է Նիկոլ Փաշինյանի՝ Նիդեռլանդներ կատարած այցի ժամանակ կազմակերպված ցույցերին իր մասնակցությամբ:
Փափազյանն ու Աբրահամյանը ԱԱԾ–ի որոշումները բողոքարկել էին։