Եվրոպական առաջնորդների կիրակնօրյա գագաթնաժողովը պղտորվել է ուրբաթ օրը Սպիտակ տանը Ուկրաինայի նախագահ Վլադիմիր Զելենսկիի հասցեին ԱՄՆ նախագահ Դոնալդ Թրամփի անսպասելի հանդիմանությամբ՝ ԱՄՆ աջակցության համար անշնորհակալ վերաբերմունքի համար, հայտնում է Associated Press-ը։

Հանդիպումը Լանկասթեր Հաուսում՝ Բուքինգհեմյան պալատի մոտ գտնվող նրբաճաշակ 200-ամյա առանձնատանը, տեղի է ունենում Սպիտակ տան ուշադրությունը Ուկրաինայի վրա կենտրոնացնելու, Ուկրաինան բանակցությունների կենտրոնում դնելու և ԱՄՆ-ին Եվրոպայի կողմը տրամադրելու նպատակով:

Մեծ Բրիտանիայի վարչապետ Քիր Սթարմերը, որը հյուրընկալում է ավելի քան մեկ տասնյակ երկրների ղեկավարների և այլ պաշտոնյաների, հայտարարել է, որ վճռական է Ուկրաինայի հետ Ռուսաստանի պատերազմին վերջ դնելու հարցում:

«Մենք միավորվելու հնարավորություն ունենք, որպեսզի ապահովենք Ուկրաինայում արդար և կայուն խաղաղությունը, որը կերաշխավորի նրա ինքնիշխանությունն ու անվտանգությունը։ Հիմա ժամանակն է, որ մենք համախմբվենք, որպեսզի ապահովենք լավագույն արդյունքը Ուկրաինայի համար, պաշտպանենք եվրոպական անվտանգությունը և ապահովենք մեր հավաքական ապագան»,- այն ժամանակ ասել էր Սթարմերը։

Գագաթնաժողովին կմասնակցեն նաև Ֆրանսիայի, Գերմանիայի, Դանիայի, Իտալիայի, Նիդեռլանդների, Նորվեգիայի, Լեհաստանի, Իսպանիայի, Կանադայի, Ֆինլանդիայի, Շվեդիայի, Չեխիայի և Ռումինիայի ղեկավարները։

Գագաթնաժողովին ներկա են լինելու նաև Թուրքիայի արտգործնախարարը, ՆԱՏՕ-ի գլխավոր քարտուղարը և Եվրահանձնաժողովի և Եվրոպական խորհրդի նախագահները։

Զելենսկին լայն աջակցություն է ստացել ողջ Եվրոպայի առաջնորդներից Սպիտակ տանը տեղի ունեցած բացառիկ ձախողումից հետո:

Սթարմերը գրկել էր Զելենսկիին, երբ շաբաթ օրը նա ժամանել էր մասնավոր հանդիպման՝ գագաթնաժողովից մեկ օր առաջ:

Եվրոպան անհանգիստ է այն պահից, երբ Թրամփը խաղաղության ուղիղ բանակցություններ նախաձեռնեց Ռուսաստանի նախագահ Վլադիմիր Պուտինի հետ, որը երեք տարի առաջ Ուկրաինա ներխուժելուց հետո մեկուսացված էր արևմտյան առաջնորդների մեծ մասի կողմից:

Պայքարը արդիական մնալու և եվրոպական շահերը պաշտպանելու համար է, քանի որ նրանց երբեմնի հավատարիմ դաշնակիցը, կարծես թե, սիրաշահում է Պուտինին։ Իրավիճակն ավելի տագնապալի դարձավ, երբ Թրամփը Զելենսկիին բռնապետ անվանեց և ասաց, որ Ուկրաինան է սկսել  պատերազմը: Վերջին օրերի հանդիպումները որոշակի հույսեր էին տվել՝ մինչև Զելենսկիի այցը Սպիտակ տուն։

Օվալաձև գրասենյակ Ֆրանսիայի նախագահ Էմանուել Մակրոնի և Սթարմերի այցելությունները ճիշտ ուղղությամբ քայլեր էին ընկալվել:

Հանդիպումները ջերմ էին, և Թրամփը նույնիսկ մեղմացրել էր իր տոնը Ուկրաինայի նկատմամբ, թեև չէր պարտավորվել ԱՄՆ-ի կողմից անվտանգության երաշխիքներ ապահովել և պնդել էր, որ Եվրոպան պետք է խաղաղապահ զորքեր տրամադրի:

Սթարմերի՝ Վաշինգտոնից վերադառնալուց 12 ժամ հետո խաղաղության մասին խոսակցությունները, կարծես թե, դադարեցին, քանի որ ԱՄՆ փոխնախագահ Ջ.Դ․ Վենսը նախատեց Զելենսկիին այն բանի համար, որ նա վիճարկում է Թրամփի պնդումն այն մասին, որ Ռուսաստանի նախագահ Վլադիմիր Պուտինին կարելի է վստահել։

«Սթարմերը տպավորիչ աշխատանք կատարեց՝ հաստատելով Եվրոպայի դերը Ուկրաինայի պատերազմում և հայտնելով նախագահ Թրամփին, որ Եվրոպան պատրաստ է և ի վիճակի է առաջատար դեր ստանձնել ցանկացած վստահելի խաղաղ համաձայնագրի իրականացման գործում, - ասել է Միացյալ ծառայությունների թագավորական ինստիտուտի, պաշտպանության և անվտանգության վերլուծական կենտրոնի գլխավոր տնօրեն Ռեյչել Էլեհուուսը:-  Ցավոք, ուրբաթ օրը Սպիտակ տանը կայացած հանդիպումը լուրջ հետընթաց քայլ էր»:

Ուկրաինան այլևս չի կարող հույս դնել ԱՄՆ-ի ռազմական կամ քաղաքական աջակցության վրա այն բանից հետո, երբ Թրամփը հայտարարեց բանակցություններում իր չեզոքության մասին, ասել է Էլեհուուսը:

Ըստ նրա, Եվրոպան պետք է միջամտի և կարողանա մոտ 200 միլիարդ եվրո ազատել կալանված ռուսաստանյան ակտիվներից՝ այդ ջանքերը ֆինանսավորելու համար:

«Լոնդոնյան հանդիպման նպատակը պետք է լինի Ուկրաինային պայքարի մեջ պահելը, որպեսզի այն կարողանա բանակցել առավելագույն ուժի դիրքերից»,- ասել է նա։