Ազգային ժողովի Հանրապետական խմբակցության պատգամավոր Աշոտ Աղաբաբյանը (Բուռնաշը) ճիշտ է համարում նախագահ Սերժ Սարգսյանի ելույթը, այն անվանելով պատճառաբանված: Այս մասին NEWS.am-ի թղթակցի հետ զրույցում ասաց պատգամավորը:
Նա նշեց, որ նախագահի ելույթն ամբողջությամբ ճշմարտություն է եւ այդպես էլ պետք է լիներ, Գագիկ Ծառուկյանը չի մասնակցում ԱԺ նիստերին, բայց հայտարարում է, թե ժողովրդի կողքին է: Աշոտ Աղաբաբյանը նշեց, որ իրենց տարիներ ի վեր իսկապես արգելվել է խիստ գնահատականներ տալ Գագիկ Ծառուկյանին, իրենք, ինչպես զինվորներ, լսել են իրենց գլխավոր հրամանատարի՝ կուսակցության ղեկավարի խոսքը: Նա համաձայն չէ, որ ԲՀԿ-ի դեմ պատերազմ է հայտարարված, «ԲՀԿ-ն ոչ բանակ է, ոչ էլ եսիմ ինչ, որ պատերազմ հայտարարենք, ընդամենը մի շարքային կուսակցություն է»,-ասել է նա:
Միեւնույն ժամանակ, ՀՀԿ-ական պատգամավորն ասաց, որ այնտեղ եւս շատ նորմալ, լավ մարդիկ կան, որոնք իրենց ընկերներն են:
Նա նշեց, որ կարեւոր է նաեւ իրավապահների խոսքը, օրենքը պետք է բոլորի համար հավասար լինի: «Ամեն մարդ պիտի իմանա, որ ճշմարտությունը կբացահայտի, եթե թաքցնում են պետությունից գումարներ, մինուս տեղեր ունենալով՝ մեծ-մեծ խոսելը ո՞րն է: Հայաստանում երկրաշարժ եղավ, պատերազմ եղավ, էդքան գումարներ որտեղի՞ց իրեն, տունը ավելի մեծ է, քան սարքած եկեղեցին, էդ ինչերո՞վ»,-ասաց պատգամավորը:
Հիշեցնենք, որ փետրվարի 12-ին, ՀՀԿ խորհրդի նիստում ՀՀ նախագահ Սերժ Սարգսյանը հայտարարել էր, թե Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։
