Ապրիլի 4-ի գիշերը Ադրբեջանի Զինված ուժերը շարունակել են հրետակոծել ԼՂՀ Պաշտպանության բանակի դիրքերը եւ մոտակա հայկական բնակավայրերը։ Մարտերը շարունակվում են շփման գծի ողջ երկայնքով։ NEWS.am-ը ներկայացնում է ապրիլի 4-ի իրադարձությունների ժամանակագրությունը։

  • ԼՂՀ ՊԲ.Այս գիշեր Ադրբեջանի զինուժը շարունակել է արկակոծել ՊԲ առաջնային դիրքերն ու բնակավայրերը։ Առավոտյան ժամը 07:00-ից առավել ինտենսիվ հրետակոծություններ են սկսվել շփման գոտու հարավարեւելյան եւ հյուսիսարեւելյան ուղղություններով:Ադրբեջանական բանակը կիրառում է 152 միլիմետրանոց հրանոթներ, «Գրադ» կայանքներ եւ տանկեր:

  • ՀՀ ՊՆ.Հայկական կողմը 3 տանկ է ոչնչացրել հյուսիսարեւելյան ուղղությամբ:

  • ՀՀ ՊՆ մամուլի խոսնակ Արծրուն Հովհաննիսյանը հրապարակել է Մատաղիսի հատվածում ադրբեջանական սպանված հատուկ ջոկատայինների լուսանկարները։

  •  

  • Կոնգրեսական Բրեդ Շերման.Ադրբեջանի նախագահ Իլհամ Ալիեւը նոր հարձակումներ է սկսել Լեռնային Ղարաբաղի դեմ։ Ես խստորեն դատապարտում եմ այդ ագրեսիան, եւ կարծում եմ, որ ԱՄՆ-ի աջակցությունն Ադրբեջանին պետք է դադարեցվի։ 

  • Ամերիկյան պետությունների կազմակերպության գլխավոր քարտուղար Լուիս Ալմարգո. Թիրախավորելով քաղաքացիական օբյեկտները՝ Ադրբեջանն խախտում է զինված հակամարտությունը կարգավորող հիմնարար կանոնները։ Կոչ ենք անում Ադրբեջանի իշխանություններն վերականգնել Մինսկի խմբի մարմինների հետ հանդիպումները: 

  • ԼՂՀ ՊԲ.Թեժ մարտերը շարունակվում են։ Հարավարեւելյան ուղղությամբ ադրբեջանական զինուժը կորցրել է եւս 2 տանկ։ 

  • ԱՄՆ Կոնգրեսի Հայաստանի աջակցության խմբի համանախագահն Ռոբերտ Դոլդ. Ադրբեջանը շարունակում է ասել մեկ բան, անել դրա հակառակը։ 

  • ԼՂՀ  նախագահ Բակո Սահակյանն ընդունել է «Երկրապահ կամավորականների միության» պատվիրակությանը։ 

  • ՀՀ ՊՆ մամուլի խոսնակ.Ադրբեջանական ամբողջական ստորաբաժանումներ են ոչնչացվել, որոնք ռեզերվից փորձել են տեղափոխվել առաջնագիծ։ 

  • ՀՀ ՊՆ-ն հրապարակել  է զոհված 7 հայ զինծառայողների անունները։ 

  • Ռուսաստանի պատմական գիտությունների դոկտոր Անդրեյ Զուբով. Ռուսաստանը ստիպված կլինի կողմնորոշվել, թե ում է պաշտպանում։ 

  • ՀՀ խորհրդարանը ԵԱՀԿ Մինսկի խմբի համանախագահներին կոչ է անում հասցեավորված պատասխան տալ ադրբեջանական կողմին։ 

  • ՌԴ Պետդումայի ղեկավար Սերգեյ Նարիշկին. ԼՂ խնդրի կարգավորման ուղին անցնում է երկխոսության եւ փոխադարձ համաձայնության միջով։ 

  • ԼՂՀ նախկին փոխարտգործնախարար Մասիս Մայիլյան. Միջազգային միջնորդների հնացած մոտեցումները պաշտոնական Բաքվին կեղծ հույսեր են տալիս։ 

  • ԲՀԿ ղեկավար Նաիրա Զոհրաբյան. ԵԽԽՎ նախագահ Պեդրո Ագրամունտը ռազմական հանցագործ է։ 

  • Ֆրանսիայում ԼՂՀ մշտական ներկայացուցիչ Հովհաննես Գեւորգյանը՝ France24-ին. Ժամանակն է Ադրբեջանի դեմ պատժամիջոցներ ընդունել։ Չի կարելի այլեւս բավարարվել միայն հայտարարություններով։ 

  • ՀՀ ՊՆ խոսնակ. Ադրբեջանական ստորաբաժանումները փորձել են կիրառել ծանր տեխնիկա եւ մարտական անօդաչու թռչող սարքեր: Հայ դիրքապահները շարքից հանել են այդ համակարգերը, իսկ ՀՕՊ ստորաբաժանումները խոցել են մեկ հարվածային։  

  • Ազգային ժողովում 1 րոպե լռությամբ հարգեցին Ղարաբաղում զոհվածների հիշատակը։ 

  • ԼՂՀ նախագահի մամուլի խոսնակ Դավիթ Բաբայան. Ադրբեջանական բանակի շարքերում թուրքական բանակի սպաներ են կռվում։ 

  • ԼՂՀ ՊԲ.Հակառակորդը շփման գծի հյուսիսարեւելյան ուղղությամբ առաջին անգամ կիրառել է ТОС (Тяжелая огнеметная система) ծանր հրանետային համակարգեր: Ղարաբաղյան կողմը ТОС-ի կիրառումից զոհեր չունի։ 

  • ԱԺ փոխխոսնակ Էդուարդ Շարմազանով. Այս դժվարին պահին չկա իշխանություն ու ընդդիմություն. մենք բոլորս եղբայրներ ու քույրեր ենք։ 

  • ՀՀ խորհրդարանի պատգամավորներն այցելել են վիրավոր զինծառայողներին։  

  • ՀՀ նախագահ Սերժ Սարգսյանը հանդիպում է անցկացնում ԵԱՀԿ երկրների դեսպանների հետ։ 

  • ՌԴ արտգործնախարար Սերգեյ Լավրով. Ղարաբաղի հարցով ԵԱՀԿ Մինսկի խմբի ձեւաչափի փոփոխությունը նպատահակարմար չէ։ 

  • Հայաստանի պաշտպանության նախկին նախարար Վաղարշակ Հարությունյան. Բաքուն շանտաժի է ենթարկում Երեւանին եւ ԵԱՀԿ Մինսկի խմբին։ 

  • Սերժ Սարգսյան.Եթե ռազմական գործողությունները շարունակվեն, Հայաստանը ճանաչելու է ԼՂ անկախությունը։   

  • Հայ զինծառայող Նարեկ Մալխասյանը պատմել է, թե ինչպես է ոչնչացրել ադրբեջանական ուղղաթիռը։ 

  • ՀՀ ՊՆ մամուլի խոսնակ.Ադրբեջանը կիրառում է պատժիչ ջոկատներ, որոնք գնդակահարում են նահանջողներին:

  • ՌԴ նախագահի մամուլի քարտուղար Դմիտրի Պեսկով.Պուտինի, Սարգսյանի եւ Ալիեւի միջեւ որեւէ հեռախոսային բանակցություն չի եղել: Համաձայնեցված համատեղ միջոցառումներ նույնպես չկան: 

  • ՌԴ Դաշնության Խորհրդի նախագահ Վալենտինա Մատվիենկո. Բաքուն եւ Երեւանը պիտի հասկանան սրացում թույլ չտալու գործում պատասխանատվությունը: 

  • ՌԴ Դաշնության Խորհրդի Միջազգային հարցերի հանձնաժողովի նախագահ Կոնստանտին Կոսաչեւ. Անկարայի միակողմանի եւ անպատասխանատու դիրքորոշումը  յուղ է լցնում կրակին:  

  • 26-ամյա կապիտան Արմենակ Ուրֆանյանը միայնակ ոչնչացրել է 1 տանկ եւ թշնամու մոտ 10 զինվոր։ Վերջին նռնակով իր հետ միասին պայթեցրել է մոտեցողներին։

  • Արմենակ Ուրֆանյան

  • ՀՀ նախագահ Սերժ Սարգսյան.Տարածաշրջանում խաղաղության հաստատման մեջ շահագրգիռ բոլոր կողմերից ակնկալում ենք Բաքվից բացատրություն պահանջել ռազմական գործողություններ սկսելու կապակցությամբ։ 

  • Սերժ Սարգսյան.Անհրաժեշտ է ավելացնել ԵԱՀԿ գործող նախագահի անձնական ներկայացուցչի դաշտային օգնականների քանակը: 

  • Սերժ Սարգսյան.Ադրբեջանը պետք է սկսի ուղիղ խոսել Ղարաբաղի իշխանությունների հետ՝ անկախ նրանից հավանում է նրանց, թե` ոչ:

  • Սերժ Սարգսյան.Որեւէ տարածք ադրբեջանցիները չեն «ազատագրել», այս պահին ողջ շփման գծի երկայնքով ընդամենը մի փոքրիկ հատված հարավում եւ մի փոքրիկ հատված հյուսիսում, ընդամենը 200-300 մետր տարածք են գրավել ադրբեջանցիները՝ տալով ամեն մետրի համար մեկից ավելի զոհ: 

  • ՀՀ ՊՆ.Մարտական գործողությունների ընթացքում հակառակորդը ԼՂՀ զինծառայողների եւ խաղաղ բնակչության դեմ բազմաթիվ գործողություններ է իրականացրել։ Դրանցից առավել ակնհայտ են զինված ընդհարումներին այլեւս չմասնակցող կոմբատանտների եւ ռազմագերիների խոշտանգումները, խաղաղ բնակչության սպանությունները, դիակների խոշտանգումները եւ այլն: Այդ հանցագործությունները ռազմական հանցագործություններ են։ Պատերազմական հանցագործությունների համար ինչպես Ադրբեջանի իշխանությունները, այնպես էլ  ռազմական հանցագործություններ կատարած անձինք պետք է իրավական պատասխանատվության ենթարկվեն։ 

  • Գերմանիայի արտգործնախարար Ֆրանկ Վալտեր Շտայնմայերը մտադիր է մինչեւ օրվա վերջ ՌԴ արտգործնախարար Սերգեյ Լավրովի հետ քննարկել հակամարտության գոտում իրավիճակը: 

  • Կիպրոսի կառավարություն. Ադրբեջանին կոչ ենք անում հարգել ստատուս քվոն: 

  • Սերժ Սարգսյանն այցելել է մարտական գործողությունների հետեւանքով վիրավորված զինծառայողներին: 

  • Հունաստանը ղարաբաղյան հակամարտության կողմերին զսպվածության կոչ է անում: 

  • Ղարաբաղի բնակիչները մասնակցել են ադրբեջանական ագրեսիայի հետեւանքով զոհված 12-ամյա Վաղինակ Գրիգորյանի հուղարկավորությանը։ 

  • ԼՂՀ արտգործնախարար Կարեն Միրզոյանը հեռախոսազրույց է ունեցել Մերձդնեստրի Մոլդովական Հանրապետության արտգործնախարարի ժ.պ Վիտալի Իգնատիեւի հետ։

  • ՀՅԴ խմբակցության ղեկավար Արմեն Ռուստամյան.Սփյուռքի կառույցներն աշխատում են Ադրբեջանին ագրեսոր ճանաչելու ուղղությամբ։  

  • Իտալիայի ԱԳՆ-ն բոլոր կողմերին կոչ է արել զերծ մնալ թշնամանքի հետագա ակտերից։ 

  • ԼՂՀ Գլխավոր դատախազությունում քրեական գործեր են հարուցվել Ադրբեջանի կողմից ագրեսիայի փաստերի առնչությամբ։

  • Լրատվամիջոցներ.ԻՊ-ի ադրբեջանական ջոկատը լքել է Սիրիան եւ մեկնել Ղարաբաղ՝ պատերազմի։ 

  • ՀՀ նախագահ Սերժ Սարգսյանն Երեւանի Ս. Գրիգոր Լուսավորիչ մայր եկեղեցում ներկա է գտնվել Հայրենիքի եւ հայրենյաց պաշտպան զինվորների համար մատուցված միասնական աղոթքին:

  • ԼՂՀ կառավարությունը օպերատիվ շտաբ է ստեղծել։ 

  • ԼՂՀ ԱԳ նախարար Կարեն Միրզոյան. Միջազգային հանրությունը պետք է ճանաչի Ղարաբաղի անկախությունը։ Դա միակ արդյունավետ միջոցն է սանձել Ադրբեջանի նկրտումները։

  • ԼՂՀ ՊԲ.Սկսած ապրիլի 2-ից ժամը 11:00-ի դրությամբ հայկական կողմն ունի 20 զոհ, 26 անհետ կորած, 72 վիրավոր: Ունի  նաև 7 տանկի կորուստ:  Ադրբեջանական կողմը տվել է 300-ից ավելի զոհ, վիրավորների թիվը ճշտվում է: Կորցրել է 18 տանկ, 2 ուղղաթիռ, մեկ ինժեներական տեխնիկա, 3 հետեւակի մարտական մեքենա, 6 անօդաչու թռչող սարք, 1 ՄՄ-21 («Գրադ») կայանք:

  • ՀՀ պաշտպանության նախարարի առաջին տեղակալ Դավիթ Տոնոյանը ԿԽՄԿ-ին տեղեկացրել է ադրբեջանցիների զինվորական հանցագործությունների մասին:

  • ՌԴ ԱԳ նախարար Սերգեյ Լավրովն ու ԱՄՆ պետքարտուղար Ջոն Քերրին հեռախոսազրույցում քննարկել են Լեռնային Ղարաբաղում տիրող իրավիճակը: 

  • ՀՀ ԱԳ փոխնախարար Շավարշ Քոչարյան.Ադրբեջանը խախտում է Միջազգային մարդու իրավունքները եւ մարդասիրական իրավունքը: 

  • ՆԱՏՕ-ն Լեռնային Ղարաբաղում կրակի դադարեցման կոչ է անում: 

  • Դավիթ Տոնոյանը Ստեփանակերտին հարվածելու Ադրբեջանի ՊՆ հայտարարության մասին զգուշացրել է ԵԱՀԿ նախագահի անձնական ներկայացուցիչ Անջեյ Կասպրշիկին: 

  • Ադրբեջանական զինուժը ուղեւորատար ավտոբուս է ռմբակոծել Մարտակերտում, զոհվել է 5 մարդ: 

  • ԱՄՆ փոխնախագահ Ջոզեֆ Բայդենը  զրուցել է Հայաստանի եւ Ադրբեջանի նախագահների հետ:  

  • ԼՂՀ ՊԲ.Մեր զինուժի հաջողությամբ է պայմանավորված Ադրբեջանի անհավասարակշիռ հայտարարությունը, ըստ որի նրանք հանդես են գալիս Արցախի  խաղաղ բնակավայրերի եւ մասնավորապես մայրաքաղաք Ստեփանակերտի ռմբահարման սպառնալիքներով: Զգուշացնում ենք անձամբ Հասանովին եւ նրա «գերագույնին», որ նման զարգացումների դեպքում արձագանքը լինելու է անհամաչափ եւ ավելի ցավոտ:

  • Ռուսաստանի եւ Գերմանիայի ԱԳ նախարարներ Սերգեյ Լավրովն ու Ֆրանկ-Վալթեր Շթայնմայերը հանդես են եկել Լեռնային Ղարաբաղում անհապաղ հրադադարի հաստատման օգտին: 

  • ԼՂՀ ՊԲ.Մեկ օրում Ադրբեջանը կորցրել է 11 տանկ, 4 ԱԹՍ: Ընդամենը Ադրբեջանի խփված տանկերի թիվը 29-ն է, 10 ԱԹՍ, 1 «Գրադ»:

  • Ադրբեջանական կողմը ռմբակոծել է լրագրողների մեքենաները, որոնք վերադառնում էին Մատաղիսից: Տուժածներ չկան: 

  • Լավրովը Բաքվում Ադրբեջանի եւ Իրանի ԱԳ նախարարների հետ կքննարկի ղարաբաղյան իրադրությունը:  

  • Մարտակերտի շրջանում Ադրբեջանի կողմից մարդատար ավտոբուսի ռմբակոծման հետեւանքով զոհերի թիվը հասել է 7-ի:  

  • Ղարաբաղյան հակամարտության գոտում իրավիճակի սրումը. իրադարձությունների ժամանակագրություն՝ ապրիլի 2-3-ին (ֆոտո, վիդեո)