Սպիտակ տունը 2023 թ. իր բյուջեի շրջանակում երկուշաբթի նոր նվազագույն հարկ կներկայացնի միլիարդատերերի համար՝ առաջին անգամ առաջարկելով հարկ սահմանել 700 ամենահարուստ ամերիկացիների համար: Այս մասին հաղորդում է The Washington Post-ը՝ վկայակոչելով 5 անձանց, որոնք քաջատեղյակ են այդ հարցին, և հղում անելով ԱՄՆ վարչակազմի փաստաթղթի, որը հայտնվել է պարբերականի տիրապետության տակ:

«Միլիարդատերերի նվազագույն եկամտի հարկի» ծրագիրը՝ ԱՄՆ նախագահ Ջո Բայդենի ղեկավարությամբ, հարկի 20-տոկոսանոց նվազագույն դրույք կսահմանի բոլոր ամերիկյան ընտանիքների համար, որոնց կարողությունը գերազանցում է 100 մլն դոլարը, ասվում է փաստաթղթում: Այդ հարկով գանձվելիք նոր եկամուտների մեծ մասը կստացվի միլիարդատերերից:

Բայդենը վաղուց կողմ է արտահայտվում մեծահարուստ ամերիկացիների համար հարկերի բարձրացմանը, սակայն մինչ այս պահը Սպիտակ տունը միլիարդատերերին ուղղված հարկային ծրագիր չէր ներկայացրել:

Միլիարդատերերից շատերը կարող են շատ ավելի ցածր հարկեր վճարել, քան միջինվիճակագրական ամերիկացիները, քանի որ դաշնային կառավարությունը նրանց բաժնետոմսերի արժեքի աճի հարկ չի գանձում, քանի դեռ այդ ակտիվները չեն վաճառվել:

Սպիտակ տան կառավարման և բյուջեի վարչության եւ տնտեսական հարցերով խորհրդատուների խորհրդի՝ աշնանն անցկացված գնահատումներով՝ 2010-2018 թթ. ընթացքում միլիարդատերերի 400 ընտանիք միջինում իրենց եկամտի 8 տոկոսից փոքր-ինչ ավելի դաշնային հարկ է վճարել: Այս դրույքն ավելի ցածր է, քան այն, որը վճարում են միլիոնավոր ամերիկացիներ:

Սպիտակ տան ծրագիրը միլիարդատերերին պարտավորեցնում է հարկ վճարել՝ նվազագույնը 20 տոկոսի չափով իրենց ողջ եկամտի կամ աշխատավարձի եւ չիրացված եկամտի համադրության համար, որը նրանք կարող էին ստանալ, օրինակ, բաժնետոմսերի գնաճից:

Միլիարդատերերը, որոնք վճարում են այդ դրույքաչափից ցածր տոկոսով, ստիպված կլինեն վճարել ներկայիս վճարվող հարկի և 20-տոկոսանոց հարկի տարբերությունը: Միլիարդատերերը, որոնք արդեն վճարում են ավելի քան 20 տոկոսը, հավելյալ հարկեր չպետք է վճարեն:  

Սպիտակ տան պաշտոնյաների գնահատումներով՝ ուժի մեջ մտնելու պարագայում այս հարկը մոտ 360 մլրդ դոլարի նոր եկամուտ կբերի առաջիկա 10 տարվա ընթացքում,- ասվում է փաստաթղթում: