նախընտրելի դարձնել
Մի շարք զինված հակամարտությունների հետեւանքով այսօր Եվրոպայում կան շուրջ 20.000 անհայտ կորածներ, եւ այս խնդիրը շարունակում է օրակարգային մնալ ԵԽ անդամ մի շարք երկրներում։ Այս մասին Ստրասբուրգում ԵԽԽՎ աշնանային նստաշրջանում, ռազմական կոնֆլիկտների ժամանակ անհայտ կորածներին հայտնաբերելու մասին հարցի քննարկման ժամանակ ունեցած իր ելույթում նշել է Հայաստանի պատվիրակության անդամ, ԲՀԿ խմբակցության քարտուղար Նաիրա Զոհրաբյանը:
Նրա խոսքով՝ անհայտ կորած անձանց ընտանիքներն իրավունք ունեն տեղեկացված լինելու, թե ի՞նչ է կատարվել իրենց մերձավորների հետ, նրանք նաեւ պետք է տեղեկացնել բոլոր կատարվող քայլերի մասին։
«Ես բազմաթիվ անգամներ զրուցել եմ Ադրբեջանի կողմից սանձազերծված պատերազմի արդյունքում Լեռնային Ղարաբաղից անհայտ կորած երիտասարդների մայրերի ու երեխաների հետ, եւ ես կդժվարանամ հիմա, այստեղ, ձեզ ներկայացնել այն ապրումները, որ ունեն անհայտ կորածների ծնողները, կանայք ու երեխաները։ Դռան ամեն թակոց նրանց համար հույս է, ամեն զանգ նրանց համար հավատ է, որ իրենց զավակը վերադառնալու է տուն։ Ու հիմա այստեղ, այս դահլիճում մենք կրկին լսեցինք, թե ինչպես Ադրբեջանի պատվիրակը հերթական անգամ խեղաթյուրեց փաստերն ու հերթական անգամ այս դահլիճում հնչեց ադրբեջանական սուտն ու կեղծիքը»,-հայտարարել է Զոհրաբյանը:
«Իսկ ի՞նչ ենք անում մենք՝ խորհրդարանականներս ու ազգային կառավարությունները՝ մեր գործընկեր Ջիմ Շերիդանի զեկույցում բարձրացված կարեւորագույն հարցերի մարդասիրական պատասխաններն ու լուծումները գտնելու համար։ Իրավացի է զեկույցի հեղինակը նշելով, որ անհայտ կորածներին հայտնաբերելու հարցում անչափ կարեւոր է համագործակցությունն ու տեղեկատվության փոխանակումը նաեւ դե ֆակտո իշխանությունների հետ։ Սա եղել է մեր առաջարկը եւ ես շնորհակալ եմ հեղինակից, որ նա ընդունել է մեր առաջարկն ու այն ներառել զեկույցում։ Սա իրապես առանցքային հարց է, ուստի պետք է մշակել առավել ճկուն մեխանիզմներ՝ փաստացի իշխանությունների հետ արդյունավետ աշխատելու համար։ Ես ողջունում եմ այս կարեւոր արձանագրումը զեկույցում, քանզի բոլորիս նպատակը մեկը պետք է լինի, անել հնարավորը՝ անհայտ կորածներին հայտնաբերելու համար»,-ընդգծել է նա:
Զոհրաբյանի խոսքով՝ փոխգործակցությունը դե ֆակտո իշխանությունների հետ այս լրջագույն խնդրի լուծման մարդասիրական ճանապարհներից մեկն է, որովհետեւ «բոլորս էլ հասկանում ենք, որ զինված հակամարտությունների հետեւանքով անհայտ կորածների խնդրի լուծումը կենսական նշանակություն ունի եվրոպական մայրցամաքում խաղաղություն հաստատելու համար»:
