27-ամյա Դավիթ  Պապյանից, ով մեղադրվում է  նախկին զոքանչին հրելու  եւ կնոջը ծեծելու մեջ, զոքանչը 300 հազար դրամ գումար է պահանջել հաշտվելու համար: Այս մասին  NEWS.am-ի  թղթակցի հետ զրույցում ասաց Դավիթ Պապյանը եւ ավելացրեց, որ այսօր` դեկտեմբերի 2-ին կայացել է գործով վերջին դատը:

«Պարզվեց՝ այդ մարդիկ ինձանից փող պոկելու մտադրություն ունեին: Դատավորը առաջարկեց, որ կամ  հաշտվենք կամ էլ երկու կողմերի հանդեպ համաներում կիրառեն: Խորհրդակցական սենյակում արդեն նախկին զոքանչս ասաց , թե հենց հիմա 300 հազար դրամ դրեք սեղանին ես գրեմ, որ ֆռռացել, ընկել եմ, ոչ թե ինձ բրդել, գցել են: Իմ փաստաբանն էլ ջղայնացավ, ասաց՝ ոչ համաներմանն եմ համաձայն, ոչ հաշտությանը մինչեւ վերջ դատը շարունակելու ենք: Հետո, թե 60 հազար դրամ տվեք: Ասացինք՝ ոչ մի կոպեկ եւ ստիպված հաշտության պայմանագիրը կնքեցինք, քանի որ կեղծ ցուցմունքներ էին տվել եւ զրպարտությամբ հանդես եկել»,- պատմեց Դավիթ Պապյանը եւ ավելացրեց, որ դեկտեմբերի 12-ին էլ տեղի է ունենալու երեխայի խնամակալության գործով դատավարությունը:

Ավելի վաղ 27-ամյա Դավիթ  Պապյանը պատմել էր, որ  ընտանիքում անհաշտությունը սկսել է այն բանից հետո, երբ կնոջը Մոնումենտ չի տարել: 

Ավելի վաղ տեղեկացրել էինք, որ Աբովյանում 27-ամյա Դավիթ  Պապյանը վնասել է  նախկին զոքանչին եւ ծեծել կնոջը: Սակայն նախկին կինն էլ ծեծի է ենթարկել Դավիթ  Պապյանին: Աբովյանի ընդհանուր իրավասության դատարանից  NEWS.am-ը տեղեկացել էր, որ սույն գործը քննվելու է իրենց մոտ:  Դավիթ  Պապյանին մեղադրանք է առաջադրվել այն բանի համար, որ նա 2013թ. հունիսի 27-ին ժամը 12:30-ի սահմաններում Աբովյան քաղաքի Գառնիի փողոցի 2-րդ շենքի 5-րդ բնակարանում իր երեխային տեսնելու հարցի շուրջ ծագած վիճաբանության ընթացքում անզգուշությամբ հրել է Ի.Նշանյանին, ինչի հետեւանքով վերջինս ընկել է գետնին: Բացի այդ, ծեծի է ենթարկել նախկին կնոջը՝ Մ.Պապյանին` նրա պատճառելով՝ առողջության թեթեւ վնասի հատկանիշներ չպարունակող մարմնական վնասվածքներ: Քրեական գործ էր հարուցվել 121 հոդվածի  1-ին մասով` անզգուշությամբ մեկ ուրիշի առողջությանը միջին ծանրության վնաս պատճառելը: Սույն հոդվածը պատժվում է տուգանքով` նվազագույն աշխատավարձի 50-100-պատիկի չափով,  կամ կալանքով` առավելագույնը 2 ամիս ժամկետով: Քրեական գործ է հարուցվել նաեւ  118 հոդվածով`  ծեծելը կամ այլ բռնի գործողություններ կատարելը: